Karantınniń jeńildetilýi: Sottalǵandar týystarymen qaıta kezdese alady

NUR-SULTAN. QazAqparat – QR Іshki ister mınıstrliginiń qylmystyq-atqarý júıesi mekemelerinde jazasyn ótep jatqandarǵa týǵan-týystarymen kezdesýge qaıta ruqsat etildi, dep habarlaıdy QazAqparat.

QR ІІM QAJ komıtetiniń baspasóz qyzmetinen málim etkendeı, qylmystyq-atqarý júıesiniń mekemelerinde sottalǵandar óz týystarymen jáne jaqyndarymen kezdesýi úshin daıyndyq sharalary júrgizilip jatyr.

Mekemelerdiń daıyndyǵyn aýmaqtyq sanıtarlyq-epıdemıologııalyq qyzmetter baǵalaıtyn bolady.

Degenmen, koronavırýs ınfektsııasyn juqtyrý qaýpi áli de bar ekenin eskere otyryp, uzaq merzimdi kezdesýler bir ǵana eresek adammen ruqsat etiledi. Bul rette, kezdesýge kelgen azamat PTR-testileýdiń teris qorytyndysy týraly anyqtamany usynýy qajet jáne onyń merzimi 5 kúnnen aspaýy tıis.

«Al qysqa merzimdi kezdesýler barlyq sanıtarlyq-epıdemıologııalyq sharalar saqtala otyryp, ádettegideı tártipte beriletin bolady», - deıdi QR ІІM QAJ komıteti tóraǵasynyń mindetin atqarýshy Esqalı Salamatov.

QAJ komıtetiniń habarlaýynsha, Qylmystyq-atqarý kodeksine sáıkes uzaq merzimdi kezdesýler 2 táýlikten aspaıdy jáne aldyn ala jazylý arqyly uıymdastyrylady. Uzaq merzimdi kezdesýden shyqqan sottalǵandar 14 kúndik karantınge ornalastyrylyp, ózge adamdardan oqshaýlanady. Bul sharalardyń barlyǵy sottalǵandardyń aýrýdy juqtyrmaýy úshin jáne kolonııalarda turaqty epıdemıologııalyq jaǵdaıdy saqtaý maqsatynda qabyldanyp jatyr.

Eske salsaq, karantınge baılanysty júzbe-júz kezdesýler toqtatylǵan ýaqytta telefon jáne vıdeo arqyly baılanys qamtamasyz etilgen bolatyn. Osy ýaqyt aralyǵynda sottalǵandarǵa 18 myń beınebaılanys, 350 myńǵa jýyq telefonmen jáne uzaqtyǵy 15 mınýtty quraıtyn beınesóılesýler berilse, 5 myńdaı adam uzaqtyǵy 2 saǵattan beınekezdesýlerge múmkindik alǵan.