Karantınniń qashan aıaqtalatyny belgisiz – Erlan Qojaǵapanov

ALMATY. QazAqparat – Almaty ákiminiń birinshi orynbasary Erlan Qojaǵapanov karantınniń qashan aıaqtalatyny týraly suraqqa jaýap berdi, dep habarlaıdy QazAqparat tilshisi.

«Biz ázirge karantınniń qashan aıaqtalatynyn aıta almaımyz. Ol shtabtyń sheshimine baılanysty. Ózderińiz baıqap otyrsyzdar, elimizde ınfektsııa juqtyrý kórsetkishi ósip barady. Memleket basshysy óte mańyzdy sheshim qabyldady. Qazaqstanda 3,5 mln adam tabysynan aırylyp qaldy. Olardy azyq túlikpen qamtýǵa, turaqtylyqty saqtaýǵa qarajat bólinip jatyr. Kóptegen kásiporyndar men jumys oryndary salyqtan bosatyldy», - dedi E.Qojaǵapanov.

Qala ákiminiń birinshi orynbasary qalalyq shtabtyń qalaı jumys istep jatqanyn aıtty.

«Kúnde qalalyq departament pen basqarma, arnaıy qyzmet ókilderinen quralǵan shtab bas qosady. Barlyǵy 46 adam jumyldyrylǵan. Qala ákimi, shtab basshysy Baqytjan Saǵyntaev birinshi kezekte qalanyń áleýmettik osal toptaryn qamtý jaıly baıandamasyn tyńdaıdy. Shtab halyqaralyq tájirıbe men ishki ahýalǵa baılanysty sheshim qabyldaıdy. Qala ákimi kúnde blokbeketter men karantın oshaqtaryn, emdeý oryndaryn aralaıdy», - dedi ol.