Karantınge jatýdan jaltarǵan SQO turǵyny jaýapqa tartyldy
PETROPAVL. QazAqparat – Soltústik Qazaqstan oblysynda úı karantınine alynǵan er adam talapty buzǵany úshin jaýapqa tartylady, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, 14 naýryz kúni Taıynsha aýdanynyń 36 jastaǵy turǵyny Polshadan kelgen. Nur-Sultan qalasyndaǵy áýejaıda ol 14 kún úı karantıninde otyrýǵa qolhat bergen. Alaıda eldi mekenge kelisimen-aq kásipker birden óziniń saýda ornyna barǵan.
Bul jaıynda bilgen Kırov aýyldyq okrýginiń ýchaskelik polıtsııa ınspektory onymen profılaktıkalyq áńgime júrgizip, tótenshe jaǵdaı rejımin buzǵandarǵa qoldanylatyn jaýapkershilik jaıynda túsindirgen. Aýyl turǵyny karantındi saqtaýǵa ýáde berip, Taıynsha qalasyndaǵy kópbeıindi aýdandyq aýrýhanaǵa barǵan. Biraq ol jerde dárigerlerden óziniń aýyrmaıtyndyǵy jóninde anyqtama berýdi talap etken. Medıtsına qyzmetkerleri kásipkerdi Chkalov eldi mekenindegi karantındik aýrýhanaǵa ornalastyryp, onda 28 naýryzǵa deıin bolǵan.
Karantınnen shyǵarylǵannan keıin onyń ústinen QR Ákimshilik quqyq buzýshylyqtar týraly kodekstiń 476-baby 2-tarmaǵy boıynsha ákimshilik hattama toltyryldy. Endi ol belgili bir mekendi, úıdi, páterdi belgili bir ýaqytqa deıin tastap shyǵa almaıdy. Zańdy buzǵan jaǵdaıda 10 AEK mólsherinde aıyppul tóleıdi nemese 15 táýlikke deıin qamaýǵa alynady.
Qazir osy oqıǵaǵa baılanysty jınalǵan materıal sotqa berý úshin daıyndalyp jatyr.
«Tótenshe jaǵdaı rejımin elemeýdiń arty adamdardyń densaýlyǵy men ómirine qaýip tóndiretinin esten shyǵarmaý kerek. SQO-da jeke tulǵanyń tótenshe jaǵdaı tártibin buzýdyń alǵashqy deregi tirkeldi. Jalpy, osy kúnge deıin óńir polıtseıleri 39 hattama toltyrdy. Olardyń barlyǵy saýda ortalyqtary men kóńil kóterý oryndaryna qatysty», - deıdi Taıynsha aýdandyq polıtsııa bólimi basshysynyń birinshi orynbasary Arǵyn Amanbaev.
