Karantınge tap bolǵan qostanaılyq azamat batysqazaqstandyq dárigerlerge alǵys bildirdi
ORAL. QazAqparat – Oralda karantınge tap bolǵan qostanaılyq Aleksandr Salamatov batysqazaqstandyq dárigerlerge alǵysyn bildirdi, dep habarlaıdy QazAqparat tilshisi.
Óziniń aıtýynsha, 26 naýryz kúni Germanııadan Oral qalasyna ushyp kelgen.
Eldegi tótenshe jaǵdaıǵa baılanysty sodan keıin olardy «Ivýshka» karantındik bólimshesine ornalastyrǵan.
«Bizge eki apta boıy barlyq jaǵdaıdy jasaǵany úshin oblys ákimdigine, oblystyq densaýlyq saqtaý basqarmasyna, oblystyq týberkýlezge qarsy dıspanser dırektory Maqsot Imanǵalıevke rızashylyǵymyzdy bildiremiz. Dárigerler men medbıkeler, bári kásibı ári sypaıy qyzmet kórsetip, bizge túsinistikpen qarady. Kún saıyn eki márte palatalar tazalanyp, dezınfektsııa jasaldy, tamaǵy da óte dámdi boldy», dedi Aleksandr Salamatov.
Ol sondaı-aq bólimshe meńgerýshisi Ajar Ahmedııarovaǵa ilespe qujattardy rásimdep, Oraldan Qostanaıǵa deıin kólik uıymdastyrǵany úshin alǵysyn jetkizdi.
«Qostanaıǵa jaqsy jettik, qazir úıdemin. Bári jaqsy», dedi QazAqparat tilshisine A.Salamatov.
Oblystyq týbdıspanserge qarsy dıspanser dırektorynyń orynbasary Ardaq Erǵalıevanyń aıtýynsha, «Ivýshka» karantındik bólimshesinde kúni búgin 48 adam jatyr.
«Karantındik bólimshede 5 dáriger, 15 medbıke, 15 kishi medıtsına qyzmetkeri, sondaı-aq 8 asúı qyzmetkeri jumys isteýde. Qyzmetkerler jeke qorǵanysh quraldarymen qamtamasyz etilgen, barlyq jaǵdaı jasalǵan. Olar bes mezgil tamaqtanady, kólik tasymaly da uıymdastyrylǵan», dedi A.Erǵalıeva.
