Karantınge qaramastan, egin jınaý qarqyny artty – QR AShM
«Statıstıkalyq derekter boıynsha, bıylǵy aýyl sharýashylyǵy daqyldarynyń jalpy egis alańy 22,7 mln gektardy qurady. Bul 2019 jylmen salystyrǵanda 439,2 myń gektarǵa kóp. Dándi jáne dándi-burshaqty daqyldar alaby 15,8 mln gektardy, maıly daqyldar – 2,9 mln gektardy, kókónis, baqsha daqyldary men kartop – 457,4 myń gektardy, maqta – 125,8 myń gektardy, qant qyzylshasy – 20,9 myń gektardy, azyqtyq daqyldar – 3,3 mln gektardy qurady», - deıdi mınıstr.
Spıkerdiń aıtýynsha, bıyl elimizde egin jınaý jumystary ýaqytyly bastaldy. Egin jınaý qarqyny ótken jylmen salystyrǵanda joǵary.
«Máselen, búgingi tańda respýblıka boıynsha barlyǵy 3,3 mln gektar dándi jáne burshaqty daqyldar nemese olardyń jalpy alańynyń 21,2 paıyzy jınaldy. Ótken jyly osyndaı kezeńde 2,1 mln gektar nemese 14 paıyzy jınalǵan bolatyn. Ortasha ónimdilik gektaryna 13,5 tsentnerdi qurap, 4,5 mln tonna astyq bastyryldy.
Ózderińiz biletindeı, bıylǵy jaz maýsymynda ótken jylǵydaı qýańshylyq boldy. Tótenshe jaǵdaı men karantın rejımine qaramastan, egis naýqany ońtaıly merzimde júrgizildi. Ylǵaldy jabyn men topyraqty egis aldyndaǵy óńdeý boıynsha Sapaly jáne ýaqytyly júrgizilgen is-sharalar topyraqtyń ónimdi ylǵaldyǵyn saqtap qalýǵa múmkindik berdi», - dedi Saparhan Omarov.