Karantınge qaramastan Aqtóbedegi qoǵamdyq kólik ishi lyq toly
AQTÓBE. QazAqparat - Aqtóbede karantın talabyna qaramastan, qoǵamdyq kólikter jolaýshylardy lyq toltyryp mingizip alýda. Osyǵan oraı, avtobýstardy tekserý bastaldy, dep habarlaıdy QazAqparat tilshisi.
Aqtóbe qalasynda karantın rejımi 6 sáýir kúni engizilgen bolatyn.
Oblystyq Taýalar men kórsetiletin qyzmetterdiń sapasy men qaýipsizdigin baqylaý departamentiniń basshysy Nursulý Berkimbaevanyń qaýlysyna saı qoǵamdyq kólikter tańerteń, túste jáne keshke 2-3 saǵattan júretin bolyp bekitildi. Sonymen qatar jolaýshylar salon ishinde otyrýy tıis. Al artyq adam bolsa, karantın rejımin buzǵan bolyp esepteledi.
«Karantın jarııalanyp, qoǵamdyq kólik tek arnaıy belgilengen ýaqytpen júredi. Salonǵa adamdy kóp mingizý boıynsha qazir turǵyndar tarapynan shaǵym bar. Tekserý jumystary bastaldy. Qaladaǵy eki tasymaldaý kompanııasyna eskertý berildi. Eger karantın rejımin buzý qaıtalansa, júrgizýshi men kondýktordy jumystan shyǵarý máselesi qaralady», - dedi Aqtóbe qalalyq turǵyn úı-kommýnaldyq sharýashylyq bóliminiń basshysy Bekbolat Nurashev.
Qazirgi kezde qoǵamdyq kólik sany úsh esege qysqaryp, barlyǵy 60 avtobýs 52 baǵyt boıynsha kúndelikti qyzmet kórsetip júr.
Aıta keteıik, avtobýspen qatynaıtyn aqtóbelikter karantın rejımin saqtaý múmkin emes ekenin aıtyp, áleýmettik jelilerge foto, vıdeo júkteýde.
«Biz Nur-Aqtóbe yqshamaýdanynda turamyz. Tańerteń bir avtobýsqa syımaı, ekinshisine minýge týra keldi. Sóıtip joldasym jumysqa keshigip bardy», - deıdi qala turǵyndarynyń biri.
