Karantınge baılanysty medsaqtandyrý qoryna túsimder 85,6 mlrd teńgege azaıady

ALMATY. QazAqparat - Karantınge qatysty jeńildikter engizilýine baılanysty 1 sáýir men 1 qazan aralyǵynda mindetti áleýmettik medıtsınalyq saqtandyrý júıesine túsetin qarjy kólemi 85,6 mlrd teńgege azaımaq. Onyń 29,4 mlrd teńgesi tólemnen bosatylǵan shaǵyn, orta jáne iri bıznes nysandaryna tıesili. Bul týraly «Áleýmettik medıtsınalyq saqtandyrý qory» kommertsııalyq emes AQ Almaty qalalyq fılıalynan málim etti, dep habarlaıdy QazAqparat tilshisi.

Habarlamaǵa súıensek, bıyl ekinshi toqsanda saqtandyrylmaǵandar úlesi 15 protsentke jýyqtaıdy. Atalǵan sanatqa mindetti medıtsınalyq saqtandyrý paketi sheńberinde shamamen 13,4 mlrd teńgeniń qyzmeti kórsetilmek. Taǵy 8 mlrd teńge shyǵyn shaǵyn, orta jáne iri bıznestiń 925 myń qyzmetkeriniń jarna tóleý merziminiń keıinge shegerilýine qatysty túspeıdi. Osyndaı faktorlardyń bárin esepke alsaq, medıtsınalyq saqtandyrý júıesine túsetin qosymsha júkteme 134 mlrd teńgeden asyp jyǵylmaq», - dedi qordyń baspasóz qyzmetinen.

Esterińizge sala ketsek, sáýir aıynda saqtandyrý júıesindegi jeńildik merzimi 1 shildege deıin uzartylǵan bolatyn. Jańa tártip boıynsha, saqtandyrylmaǵan azamattar mindetti áleýmettik medıtsınalyq saqtandyrý paketindegi qyzmetterdi taǵy úsh aı paıdalanýǵa múmkindik aldy.

«Halyqtyń birqatar sanattary men bıznes nysandary úshin saqtandyrý tólemderin tóleý merziminiń uzartylýy, valıýta baǵamynyń ózgerýi, karantın kezinde birqatar medıtsınalyq qşyzmet túrleriniń qysqarýy emhanalar men aýrýhanalardyń qarjylyq jaǵdaıyna keri áser etti. Sondyqtan MSQ emdeý uıymdarynyń qarjylyq turaqtylyǵy men azamattarǵa medıtsınalyq kómektiń tolyqqandy kórsetilýin qamtamasyz etý sharalaryn qolǵa aldy», - delingen habarlamada.

Osy maqsatta medıtsına uıymdarynyń qarjylyq turaqtylyǵyna analız jasaldy. Saraptama nátıjesi boıynsha medıtsınalyq qyzmetterdi kórsetýshiler shartty túrde tórt topqa bólindi. Olar:

Itop. Kórsetiletin qyzmet kólemin tómendetpegen bastapqy medıtsınalyq-sanıtarlyq kómek uıymdary (emhanalar), jedel járdem qyzmeti, onkologııalyq, psıhıatrııalyq jáne týberkýlez dıspanserleri t.b..

IItop. COVID-19 ınfektsııasyna qarsy is-sharalarǵa jumyldyrylǵan, sonyń saldarynan kishigirim bolsa da qarjy tapshylyǵyna urynǵan, josparlanǵan medıtsınalyq kómek kólemin tolyq kórsetý múmkindigi az medıtsına uıymdary.

III topqa qarjy tapshylyǵy qaýpi tónip turǵan, karantın saldarynan kórsetiletin qyzmet kólemi (sonyń ishinde, aýrýhanaǵa josparly túrde jatqyzyp emdleý) kúrt qysqarǵan emdeý mekemeleri jatady.

IV topqa konsýltatıvtik-dıagnostıkalyq qyzmetterdi qosymsha atqarýshylar jatady.

Qarjylyq turaqsyzdyqtyń aldyn alý maqsatynda Qor emdeý mekemelerine qosymsha avans tóledi, jyl basynda berilgen aldyn ala tólemdi ustap qalý grafıgine ózgerister engizdi. Sonymen qatar, ekinshi toqsanda ıgerý múmkin bolmaıtyn qarjy qaıta bóliske salynyp, 2020 jyldyń ekinshi jartysynda jumsalatyn boldy. Bul medıtsına uıymdarynyń jyldyq jospardy oryndaýyna múmkindik beredi.