Karantındik sharalardy qatań saqtaýǵa tıispiz - ınfektsıonıst
KÓKShETAÝ. QazAqparat – Karantındik sharalar qatań saqtalýy tıis. Bul týraly Kókshetaý qalalyq emhanasynyń juqpaly aýrýlar kabınetiniń meńgerýshisi Valentına Grıshmanovskaıa aıty, dep habarlaıdy QazAqparat tilshisi.
Valentına Vasılevna óńirde koronavırýs ınfektsııasymen kúresip júrgen sanaýly ınfektsıonıst dárigerlerdiń biri.
Onyń aıtýynsha, biraz óńirlerde qaýipti derti juqtyrǵan naýqastardyń sany artqany baıqalady. Buǵan árıne, birinshi kezekte turǵyndar tarapynan karantındik sharalardyń tıisti deńgeıde saqtalmaýy sebep bolyp otyrǵan jaıy bar. Sondyqtan, ol koronavırýs ınfektsııasynyń taralýyn boldyrmaý úshin azamattardy, uıymdardy, kásiporyndar men kásipkerlik sýbektilerin sanıtarlyq-epıdemıologııalyq talaptardy saqtaýǵa shaqyrady.
«Álemdegi jáne qazaqstandaǵy epıdemıologııalyq jaǵdaıǵa baılanysty birinshi kezekte maska kıip júrý qajet. Sońǵy kúnderi oblys ortalyǵynda koronavırýs juqtyrǵandardyń sany artty. Karantındik sharalar qatań saqtalýy tıis. Infektsııa aýa arqyly taralatyndyqtan kez kelgen ýaqytta, kez kelgen jerde juǵýy múmkin. Adamdarǵa kóp jınalatyn oryndar – dúken, dárihana, qoǵamdyq kólikterde maskamen júrýge shaqyramyz. Maskanyń ózin úsh saǵat saıyn aýystyryp otyrýymyz kerek. Qoldy antıseptıkpen jýyp otyrǵan mańyzdy. Epıdemııa kezinde antıseptık qoldanyp, maska taǵý adamdardyń qaýipsizdigin qamtamasyz etýge jáne koronavırýs ınfektsııasynyń taralýyn azaıtady», - deıdi Valentına Grıshmanovskaıa.
Sonymen qatar, dáriger koronavırýs ınfektsııasy taralýyn boldyrmaý úshin adamdar eń birinshi karantındik rejımdi saqtaýy jáne ózderinen góri jaqyn týystarynyń densaýlyǵy úshin alańdaýy qajettigin aıtýda.
