Karantındi saqtamaǵan mektepterge 66,9 mln teńge aıyppul salyndy - mınıstrlik

NUR-SULTAN. QazAqparat – Karantın talaptaryn saqtamaǵan el mektepterine 67 mln teńgege jýyq aıyppul salyndy. Bul týraly QR Densaýlyq saqtaý mınıstrligi Sanıtarııalyq-epıdemıologııalyq baqylaý komıtetinen málim etti, dep habarlaıdy QazAqparat.

«Respýblıka boıynsha 2021 jyldyń 1 sáýiri men 12 mamyry aralyǵynda sanıtarlyq erejeler talaptarynyń, karantın rejıminiń qanshalyqty saqtalatynyn baqylaý maqsatynda 2660 tekserý sharasy júrgizildi. Tekseris barysynda 502 mektepte talaptardy buzý oqıǵalary anyqtaldy (18,8%).

Mektepterde karantın rejımi talaptaryn buzýdyń negizgi jaǵdaılaryna tańǵy súzginiń ótkizilmeýi, qyzmetkerlerdiń betperdeni taqpaýy, tıisti ara qashyqtyqtyń belgilenbeýi, ǵımarattarda ylǵaldy tazalaý jáne dezınfektsııalyq sharalaryn ótkizýdiń buzylýy, synyptarda partalardyń arasyndaǵy qashyqtyqtyń saqtalmaýy, bakterıtsıdtik shamdar, sanıtaızerler men dezınfektsııalyq quraldar sanynyń jetkiliksizdigi, qoldanylǵan betperdelerdi jınaýǵa arnalǵan qutylardyń joqtyǵy jatady», - dedi mınıstrlikten.

Anyqtalǵan faktiler boıynsha QR ÁQK 425-baby 1-bóligi boıynsha 773 adamǵa aıyppul salyndy. Aıyppuldyń jalpy somasy 66 977 844 teńgeni quraıdy. Munymen qosa, olqylyqtardy joıýǵa qatysty 688 uıǵarym shyǵaryldy. Olardyń 321-si (45,3%) oryndaldy (367 uıǵarymnyń merzimi ótken joq).

Eske salaıyq, buǵan deıin QR Densaýlyq saqtaý mınıstrliginiń Sanıtarııalyq-epıdemıologııalyq baqylaý komıteti karantın kezinde sońǵy qońyraý men attestattardy tapsyrý saltanatyn ótkizý talaptary jarııalaǵan bolatyn.