Karantındi buzǵandarǵa 87 myń teńge aıyppul: Ereje búgin kúshine endi

NUR-SULTAN. QazAqparat – Búginnen bastap koronavırýspen aýyrǵandar jáne naýqastarmen baılanysta bolǵandar karantın rejımin buzsa 87 myń teńge aıyppul tóleıdi. Bul týraly Nur-Sultan qalasynyń bas memlekettik sanıtar dárigeri Sarhat Beısenova aıtty, dep habarlaıdy QazAqparat tilshisi.

«QR Densaýlyq saqtaý mınıstrligi koronavırýs ınfektsııasyna shaldyqqan naýqastar men olarmen baılanysta bolǵan adamdar úshin oqshaýlanýdyń mindetti rejımin kózdeıtin sanıtarlyq erejelerdi bekitti. Atalǵan talaptardy oryndamaǵany úshin QR ÁQbK 425-baby 1-tarmaǵyna sáıkes, quqyq buzýshylyqqa jol bergen tulǵalar 30 AEK nemese 87 510 teńge mólsherinde ákimshilik jaýapkershilikke tartylady. Bul ereje búgin kúshine endi», - dedi Sarhat Beısenova.

Onyń dereginshe, «Ashyq» qosymshasy iske qosylǵan sátten bastap úı karatınin buzǵan 3 140 adam anyqtaldy. Olardyń 1 436-sy koronavırýspen aýyrsa, 1 704-i naýqastarmen baılanysta bolǵan.

«Qyzyl» nemese «sary» mártebesi bar turǵyndar qalanyń qoǵamdyq oryndarynda júrý arqyly COVID-19 tasymaldaýshysy bolady ári ımmýnıteti tómen, qart adamdar men balalar jáne táýekel toobyna kiretin ózge de qala turǵyndaryna juqtyrady.