«Karantındegi juldyz» jobasy óner adamdary halyqpen birge ekendigin dáleldedi - Jeńis Seıdýllauly
Mundaı pikirdi «Qazaqkontsert» memlekettik kontsert uıymynyń dırektory Jeńis Seıdýllauly bildirdi, dep habarlaıdy QazAqparat tilshisi.
«COVID19» pandemııasyna baılanysty karantın tártibi, sonyń saldarynan paıda bolǵan keıbir qıyndyqtar men ýaqytsha daǵdarys el ishinde birqatar alańdaýshylyq týǵyzdy. Biraq Memleket basshysy Qasym-Jomart Kemeluly aıtqandaı, árbir daǵdarystyń eki jaǵy bar. Birinshiden, bul – qaýip, ekinshiden, bul – múmkindik. Biz úshin karantın óner salasyn jańasha damytýǵa úles qosatyn jańa múmkindikter kezeńine aınaldy. QR Mádenıet jáne sport mınıstrligine qarasty barlyq óner ujymdary onlaın keńistikti qarqyndy ıgerip, kórermen qaýymǵa jaqyn bola tústi», - dedi ol.
Uıym basshysynyń atap ótýinshe, 23 naýryzdan bastap QR Mádenıet jáne sport mınıstrliginiń bastamasymen Qazaqkontsert pen Qazaqtelekom uıymdary birlesip, Live formatyndaǵy «Karantındegi juldyz» atty jańa jobany bastady. Onlaın ómirge jáne áleýmettik jelilerge bet burǵan halyqtyń bos ýaqyty paıdaly, tıimdi ári pozıtıvti ótýine bul joba zor úles qosýda. Baılanys salasynyń kóshbasshysy «Qazaqtelekom» AQ-nyń zor múmkindikteri arqyly «Karantındegi juldyz» jobasy barsha halyqqa jáne elimizdiń shalǵaı jatqan óńirlerine qoljetimdi bola aldy.
«Qazirgi ýaqytta jobamyzdy tek qazaqstandyq kórermen ǵana emes, sheteldikter de tamashalaıtynyn baıqaýǵa bolady», - dedi Jeńis Seıdýllauly.
Onyń aıtýynsha, joba aıasynda tanymal qazaqstandyq óner juldyzdary men Qazaqkontserttiń ártisteri jandy daýysta jáne onlaın formatta óner kórsetedi. Ónersúıer qaýymǵa ártúrli baǵyttaǵy – folklorlyq, estradalyq, klassıkalyq jáne ult aspaptyq oryndaýda kontsertter usynylmaq. Jobanyń basty artyqshylyǵy – kórermen qaýym úıden shyqpaı, súıikti ánshileriniń ónerin úıdegi jaıly atmosferada tamashalaı alady. Buǵan qosa, kontsert barysynda tyńdarmandar óner juldyzdarymen tikeleı suhbattasyp, oı-pikirlerin bildire alady. Kontsertter Qazaqtelekomnyń Kazakhtelecomkz YouTube arnasy arqyly tegin kórsetiledi.
Osy kúnderi Roza Rymbaeva, Jeńis Seıdýllauly, Jubanysh Jeksenuly, Ǵadilbek Jańaı syndy belgili ánshiler ózderiniń onlaın kontsertterin berip úlgerdi. Kontsertter kórermenniń yqylasyna bólenýde. Tipti 26 naýryz kúni ótken Roza Rymbaevanyń onlaın kontsertin Memleket basshysy da joǵary baǵalap, kontsertti halyqtyń rýhyn kóteretin naǵyz óner týyndysy dep baǵalady. Aldaǵy ýaqytta Sáken Maıǵazıev, Medeý Arynbaev, Qurmash Mahan, Móldir Áýelbekova, Nurjan Kermenbaev jáne basqa artısterdiń kontsertteri ótedi.
«Karantındegi juldyz» jobasy óner adamdary árdaıym halyqpen birge ekendigin, qıyn kezeńde bir-birimizge qashyqtan da qoldaý kórsete alatyndyǵymyzdy dáleldeı tústi. Jalpy alǵanda, áleýmettik jelilerdi paıdalana otyryp, Qazaqkontsert ózge de tyń jobalardy qolǵa aldy. Olardyń qatarynda: «Bir ánniń tarıhy», «Mýzykalyq aspapta oınaý» ınsta-úıirmesi, úzdik kontsertterdiń beınejazbalaryn kórsetý jáne basqalary bar. Meniń oıymsha, osyndaı onlaın jobalar qazirgi kezde asa ózekti. Bul jobalar bizge tek ýaqytty paıdaly ótkizý ǵana emes, eń bastysy – halyqqa rýhanı azyq berý, demeý bolý jáne ónerimizdi nasıhattaý úshin qajet. Mádenıet pen óner – bul qashan da halyqtyń rýhanı dińgegi, sarqylmas qazynasy ekenin umytpaǵan jón», - dedi Jeńis Seıdýllauly.