Karantındegi juldyz: Qazaqstandyq ánshiler Batyrhan Shúkenovti eske aldy

NUR-SULTAn. QazAqparat – Keshe «Karantındegi juldyz» jobasy aıasynda tanymal ánshi, mýzykant, Qazaqstannyń eńbek sińirgen óner qaıratkeri Batyrhan Shúkenovti eske alý keshi ótti. Onlaın kontsertte ánshiniń ańyzǵa aınalǵan ánderi shyrqaldy, dep habarlaıdy QazAqparat tilshisi.

«Siz eńbegińiz arqyly qýanysh ákelip, jylý men jaryq sáýlesin shashsańyz, al adamdar ony sezinse, olardyń energııasy sizge oralady. Munyń óz mán-maǵynasy bar. Men efırdi dál osy sózdermen bastaǵym keledi, óıtkeni ol búgingi onlaın-kontserttiń basty keıipkeri Batyrhan Shúkenovke arnalady», - dedi keshtiń basynda ánshi Álı Oqapov.

Kesh qonaqtary - Roza Rymbaeva, Saǵynaı Abdýllın, Nadjıb Vıldanov, Renat Gaısın, Janar Duǵalova, Rústem Nurjigit, Dınaıa, Álı Oqapov, Syrymtaı Eńsepov, Jeńis Nurǵalı. Áriptesteri, dostary, mýzykanttyń jaqyndary ánshi týraly qyzyqty estelikterin bólisti.

Qazaq estradasynyń prımadonnasy Roza Rymbaeva almatylyq mýzykanttardyń resmı emes ánuranyna aınalǵan «Gavan moeı lıýbvı» ánin shyrqady.

Batyrhan Shúkenovtiń dostary men áriptesteri arnaıy beıneúndeý daıyndady. Ánshi Saǵynaı Abdýllın, reseılik estrada ánshisi Igor Sarýhanov, telejúrgizýshi Láılá Sultanqyzy, reseılik ánshi jáne kompozıtor Leonıd Agýtın jáne taǵy da basqa tanymal mýzykanttar Batyrhan týraly jyly estelikter aıtty.

«Batyrmen aralasqanda, onyń jaqsy adam ekenin túsinesiń. Ol óte meıirimdi jan jáne kásibı maman. Bizdiń kásibı estardamyzda mundaı adamdar óte az. Batyrhannyń joqtyǵy bilinedi. Onyń ornyn eshkim de basa almaıdy. Biz ony umytpaýymyz kerek. Ol bizdiń júregimizde máńgi qalady», - dedi Leonıd Agýtın.

Kontsert barysynda mýzykanttar Batyrhan Shúkenovtiń «Soldat lıýbvı», «Tvoı shagı», «Korablı lıýbvı», «Otpýstı», «Gúl Almatym», «Otan Ana», «Lıýbov-reka», «Molıtva», «Nelıýbımaıa», «Djýlııa» jáne taǵy da kóptegen ánin oryndady.