«Karantındegi juldyz» atty jańa joba bastalady
«Qazaqstandyq mádenıet jáne sport uıymdary jarııalanǵan karantın jaǵdaıynda kórermender men jankúıerlerden alystamaı, onlaın-keńistikti qarqyndy ıgerýde. Mádenı is-sharalardy ótkizýge qoıylǵan ýaqytsha shekteýler ártister úshin jańa múmkindikterge jol ashty. Karantın kezinde adamdardyń basym kópshiligi áleýmettik jelilerdi belsendi paıdalanatynyn eskere kele, ónerdiń qoljetimdiligin barshaǵa qamtamasyz etý maqsatynda QR Mádenıet jáne sport mınıstrligi jáne «Qazaqtelekom» AQ Live formatyndaǵy «Karantındegi juldyz» atty jańa jobany bastaıdy», - dep atap ótedi mınıstrlikten.
Vedomstvo málimetinshe,jýyrda qazaqstandyq ártister onlaın formatta «Qazaqtelekom» AQ-nyń telecomkz YouTube arnasy arqyly ózderiniń onlaın-kontsertterin usynady. Sondaı-aq bul kontsertter QR Mádenıet jáne sport mınıstrliginiń Facebook jáne Qazaqkontserttiń @qazaqconcert Youtube paraqshalarynda qaıtalanady. Óner súıer qaýym ár túrli baǵyttaǵy – folklorlyq, estradalyq, klassıkalyq jáne aspaptyq kontsertterdi tamashalaıdy. Kontsert barysynda tyńdarmandar óner juldyzdarymen tikeleı suhbattasyp, oı-pikirlerin bildire alady. Kontsertter tegin ári barshaǵa qoljetimdi bolmaq.
Jobanyń alǵashqy onlaın-kontserti búgin, 23 naýryz kúni saǵat 21:00-de Telecomkz YouTube arnasynan kórsetiledi. Bul keshte qońyr daýsymen, júrekke jyly únimen, ásem áýendi ánderimen kórermenniń yqylasyna bólengen óner ıesi Jubanysh Jeksenuly óner kórsetedi.
