Karantındegi balerına: Ásel Sháıkenovanyń kúnderi qalaı ótýde
NUR-SULTAN. QazAqparat – Karantın bárimizdi yńǵaısyz jaǵdaıǵa qaldyrdy. Bir kún ishinde jumys rejımi ózgerip sala berdi. Kóptegen kásiporyndar, uıymdar qashyqtan jumys istep jatyr, biraq mundaı jumys rejımi bárine birdeı yńǵaıly emes.Bul ásirese opera jáne balet teatrynyń ártisteri úshin qıyn. «Kitap oqyrmansyz bolmaıtyny sııaqty, balet kórermensiz bola almaıdy». Bul týraly balet solısi Ásel Sháıkenova QazAqparat tilshisine bergen suhbatynda aıtty.
«Shynyn aıtqanda, biz vırýs álem boıynsha tez taralyp, oqshaýlanýymyzǵa týra keledi dep oılaǵan joqpyz. Biraq ár nárseniń qaıyry bar. Úıde bolǵan kezde ómir jolyn oı eleginen ótkizip, qandaıda bir jaǵdaıǵa basqa qyrynan qaraý múmkindigi týady. Meniń úsh ulym bar. Men olarǵa jetkilikti kóńil bóle almaı júrmin be dep alańdaıtynmyn. Buryn balabaqsha – mektep – jumys – repetıtsııa dep únemi asyǵyp júretinmin. Túski as, keshki as daıyndap, balalarymnyń sabaq qaraýyna kómektesip, áńgimelesýge ýaqyt tabýym kerek bolatyn. Al keshke kórermenim kútip otyratyn. Qazir ýaqyt baıaýlap qalǵan sııaqty áserde júrmin. Bárine úlgerip jatyrmyn», - deıdi balerına.
Onyń aıtýynsha, karantınniń alǵashqy kúnderi ómir súrý yrǵaǵy ózgerip, rejım buzylyp ketken. Ol balalaryna kóbirek kóńil bólgenimen, baletti de umytpaǵan eken. Ásel áriptesterimen birge basshylardyń tapsyrmasyn oryndaıdy, burynǵy daıyndyqtan ereksheligi – árkim óz úıinde daıyndalady.
«Arnaıy daıyndalatyn oryn, baletke arnalǵan lınoleým, aına jáne basqa da daıyndyqqa qajetti quraldarsyz jumys isteý ońaı emes. Degenmen biz karantın erte me-kesh pe aıaqtalyp, súıikti jumysymyzǵa qaıtyp oralatynymyzdy bilemiz. Úı jaǵdaıynda daıyndalmasaq – jumysqa shyqqan kezde qıyn bolatynyn jaqsy túsinemiz», - deıdi ol.
Balerına taza aýada tynystaý múmkindigi bar ekenin aıtty.
«Biz jer úıde turamyz. Kúnde tańerteń 15 mınýt úıdi aınalyp júgirip kelemin. 14:00-ge qaraı baletke daıyndyq bastalady, sondaı-aq You Tube arqyly ózimniń jattyǵýlarymdy oryndaımyn. Kelesi kúni de osylaı qaıtalanady, biraq keıbir jattyǵý túri B.Knıazevtiń balet gımnastıkasymen almastyrylady. Bul - qıyn, biraq balet ártisteri úshin paıdaly gımnastıka», - deıdi ol.
Ásel Sháıkenova qalaı tamaqtanatyny týraly da aıtyp ótti.
«Arasynda tamaqtanýǵa qatysty shydaı almaı qalǵan kezim bolǵany ras. Men ara-tura ashyǵyp turýdy jaqsy kóremin. Bul degenimiz 16 saǵat tamaq ishpeý, odan ary 8 saǵat ishinde áldene jep alýǵa bolady. Tiskebasar retinde bolmasa, ádette nan múlde jemeımin», - deıdi balerına.
Ol oqyrmansyz kitap – kitap emes, tyńdarmansyz mýzyka – mýzyka emes, al kórermensiz balerına – balerına emes ekendigin aıtty.
«Ártister spektaklsiz ómir súre almaıdy. Óıtkeni biz ózimiz jaqsy kóretin ispen aınalysamyz. Bul – bizdiń óner, bizdiń shyǵarmashylyǵymyz. «Astana Opera» memlekettik opera jáne balet teatry spektaklderdi onlaın rejımde kórsetýde. Jaqynda «Spartak» qoıylymyn kórsetti, ol jerde men Egına partııasyn oryndaımyn. Bul partııa maǵan unaıdy, sebebi ol qyzyq ári tehnıkalyq turǵyda kúrdeli. Bizdi onlaın kórermenniń kóp bolǵany qýantty. Demek, bizdiń ónerimiz álem kórermenderine qyzyq. Jyly lebiz ben madaq estý jaqsy áserge bóleıdi», - deıdi Ásel Shákenova.
Balerına bolý – ońaı emes. Úzdiksiz eńbek etý kerek, sondaı-aq shydamdylyq, tózimdilik, temir tártip saqtaı bilý kerek.
«Tańdaǵan jol júregińizdiń qalaýy ma ekenin túsinip alý kerek. Ózińiz tańdaǵan saladan janyńyz lázzat alsa, barlyq qıyndyq ataýly siz úshin ońaı bolady. Ózińe, armanyńa sene bilý kerek. Alǵa aıqyn maqsat qoıyp, ony iske asyrý úshin batyl qadamdar jasaı bilińiz. Eshkimge eliktemeı, eshkimge uqsamaýǵa tyrysyńyz. Árıne, balet áleminde úlgi tutarlyq tulǵalar kóp, biraq bireýden asyp túsýge umtylyp nemese bireýden kem bolyp qalýdan qorqýdyń qajeti joq. Eń bastysy – keshegi qalpyńnan búgingiń jaqsy bolýy kerek», - deıdi ol.
