Karantınde jatqan Aqtaý turǵyny: Kóz aldymda bolǵan oqıǵany eshqashan umytpaımyn
- 6 sáýir kúni 14-shaǵynaýdandaǵy úıden 2 naýqas anyqtalyp, bir podezdiń tutastaı turǵyndary 14 kúnge karantınge oqshaýlanǵany belgili. Sol kúngi jaǵdaıdy eshqashan esimnen shyǵarmaımyn depsiz. Qalaı boldy? Osydan bastaıyq.
- Bárimiz alǵash ret koronavırýs týraly jańalyqtardan estidik. Keıbireýimiz tipti senbedik, bizge kelmeıdi dep oıladyq. Biraq Aqtaýda indetke qarsy bastalǵan sharalardy kórip, otbasymyzben saqtyq sharalaryn qabyldaı bastadyq. Maska men qolǵap kıdik, óz qolymmen ár túrli qospalardy qosyp antıseptık jasadym. Daıyndalýym beker emes eken. Jeksenbi 5 sáýir kúni keshke dúkenge nan alýǵa ketken kelinim júgirip kelip, esiktiń aldynda polıtsııanyń tolyp júrgenin, barlyǵyna úılerinen shyqpaýdy surap jatqanyn aıtqanda tańǵaldym. Kórshimniń balkonyna baryp, ne bolǵanyn óz kózimmen kóreıin dedim. Sebebi meniń terezem teńizge qaraıdy. Dalada formadaǵy tártip saqshylary tolyp júr. Dereý syrtta júrgen kórshime telefon soǵyp, ne bolǵanyn suraı bastadym. Ol bizdiń podezdegi bir páterde naýqastar bar ekenin aıtty. Keıin jedel járdem kóligi kelip, ishindegi dárigerler arnaıy kostıýmmen shyqty. Tas tóbeme sý quıǵandaı boldy. Aıaǵym dirildep, qatty qoryqtym. Dárigerler sol keshte úsh áıeldi alyp ketti. Abyr-sabyr. Dúrligý. Túsinbeı qaldyq. Tek kútý kerektigin bildik. Túrli qańqý sózder tarap ketti. Qaısyna senerińdi bilmeısiń. Resmı aqparatty kúttik. Sonda da ondaı jaǵdaı tirkelmese eken dep úmittendik. Sol kúni keshke kórshilerimizben birlesip podezdi hlormen jýyp aldyq. Erteńgi kúni polıtseılerdiń ketpegenin, qorshaý qoıylǵanyn kórip, ras ekenine kózim jetti. Mine, tańerteń biz kútken aqparat jarııalandy: «Mańǵystaýda 5 jaǵdaı tirkeldi, onyń ekeýi búgin tańerteń anyqtaldy» -delingen habarlamada. Keıin oblystyq ishki saıasat basqarmasynyń basshysy Erjan Kúmisqalıev ortalyq kommýnıkatsııalar ortalyǵynda «Keshe keshke 4 adamdy koronavırýs juqtyrýy múmkin degen boljammen alyp ketti, onyń ekeýinen nátıje rastaldy. Olar Ózbekstannan kelgen azamatshalar. Osyǵan deıin 3 sáýirde anyqtalǵan Qyzylorda turǵynymen baılanysta bolǵan» -dep aqparat berdi. Biz osylaısha karantındegi ómirimizdi bastap kettik. Otaǵasyn jumys ýaqytsha bosatty. Balalar kompıýter aldynda. Tek ýaqyttyń ótýin kúttik. Eshqashan kóz aldymnan ketpeıdi.
- Kelesi kúni dezınfektsııa jumystary júrgizildi. Karantınge jabylǵandaryńyzdy habarlady. Muny qalaı qabyldadyńyzdar?
- Iá, oqshaýlandyq. Karantın bastalǵan sátten bastap, domofon arqyly JEK-tiń basshysy telefon nómirimdi surap aldy. WhatsApp jelisinde bizdiń podezdiń turǵyndaryn, JEK ókili jáne ákimdik qyzmetkerleriniń basyn qosatyn top ashyp jatyr eken. Tańerteńmen túgeldeı 500 metr aýmaqqa deıin dezınfektsııa jumystary isteldi. Ár páterge sanıtar mamandary kostıýmmen kelip, karantın erejesin túsindirdi. Chatta bizge ózimizge qajetti zattarymyz ben azyq-túlikti arnaıy jasalǵan sańylaýdan ákimdik qyzmetkerleri men polıtseıler alyp beretinin aıtty. Podezge maska men qolǵappen shyǵýymyz estkertildi. Qoqys tastaý da sheshildi. ıAǵnı, podezdegi esiktiń aldyna qoıamyz dep sheshtik. Ári qaraı, JEK qyzmetkerleri ózderi kún saıyn alyp ketedi.
- Demek, sizder baılanyssyz qalmadyńyzdar? Taǵy qandaı kómek kórsetildi?
- Shynymdy aıtsam, qoldaý kórsetýshiler kóp. Biz úshin alańdaıtyn da shyǵar. Ákimdik qyzmetkerleri men JEK ókilderi qandaı kómek kerektigin kúnde suraıdy. Bizdiń jumyssyz, úıinde jatqan kórshimiz bar. Soǵan biz kórshiler bolyp kómektesetinbiz. Mynandaı jaǵdaıda shyǵýǵa da qorqasyń. Sondyqtan mamandarǵa habarladyq. Ákimdikten jastar kelip, óz qaltalarynan tamaq alyp bergen eken. Rıza bolyp qaldyq. Jedel qyzmet etken Aqtaý qalalyq ákimdigine alǵysymdy aıtqym keledi. Osyndaı qıyn-qystaý zamanda birlese atqarǵan eńbek bárin jeńbek.
- 14 kún boıy kórshilerińizben aralasyzdar ǵoı. Jaqyn týystaı bolyp ketken shyǵarsyzdar?!..
- Olarmen bir úıdiń balasyndaı bolyp kettik. Karantın bitken soń, basymyz jınalyp, dalaǵa saıahatqa shyǵýdy josparlap qoıdyq. Kúnde kitap, kıno almasamyz. Oqshaýlanýdyń bir jaǵynan kómegi tıdi. Osyndaıda álemde jaqsy adamdardyń kóp ekenin, aınaladan tek jaqsylyq kútý kerektigin bilesiń. Adamzatqa adamgershilikti esine salǵandaı bul dert.
Al karantın bul indetti taratpaýdyń jalǵyz joly.
- Suhbattasqanyńyzǵa rahmet!