Karantınde zardap shekken 13 myńǵa jýyq kásipkerdiń quqyǵy qorǵaldy

ALMATY. QazAqparat - Almaty qalasy kásipkerler palatasynyń dırektory Aıtýar Qoshmambetov bıznesti qoldaý boıynsha jumys nátıjelerin baıandady, dep habarlaıdy QazAqparat tilshisi.

Onyń aıtýynsha, jyl basynan beri palataǵa kásipkerlikti qorǵaý boıynsha 207 ótinish kelip tústi Onyń 172-si (83,09%) oń sheshimin tapqan.

Qorǵalatyn menshik quqyǵynyń mólsheri - 4,7 mlrd teńge.

Almaty qalasy kásipkerler palatasynyń quqyq qorǵaý jáne sybaılas jemqorlyqqa qarsy is-qımyl jónindegi keńesiniń 7 otyrysy ótkizilip, 18 másele qaraldy. 9 másele oń sheshimin tapty, qalǵany jumys barysynda qaralyp jatyr.

Bıznes-ombýdsmenniń tapsyrmasy boıynsha tótenshe jaǵdaı kezinde Almatydaǵy iri saýda-oıyn-saýyq ortalyqtarynyń, saýda ortalyqtarynyń, saýda úıleri men basqa da kommertsııalyq nysandardyń jaldaýshylarynyń problemasy boıynsha jumys toby quryldy.

Júrgizilgen jumys nátıjesinde 2,7 mlrd teńge somasyna saýda obektilerin jalǵa alǵan 12 769 kásipkerdiń múddesi qorǵaldy.

«Sonymen qatar, palata 8 ákimshilik kedergini anyqtady. Atap aıtqanda, memlekettik qyzmetterdi alý úshin usynylǵan qujattar tiziminde kózdelmegen qujattardy negizsiz qalpyna keltirý, kásibı baqylaý kezinde «Jarnama týraly» Zańynyń talaptaryn buzý, demalys kúnderi ótkiziletin jármeńkede saýda núktesiniń jaldaý aqysyn negizsiz kóterý máselesi anyqtalǵan»,- dedi palata basshysy.

Qazaqstan Respýblıkasy Prezıdentiniń «Altyn sapa» júldesine arnalǵan baıqaýynda 14 marapattyń 4-eýin Almaty qalasynyń kásiporyndary ıelendi.

Bir kásiporyn «Іsker» arnaıy syılyǵyn aldy.

Búgingi tańda jergilikti bıýdjetten 84,5 mlrd teńge somasyna 11 memlekettik-jekeshelik áriptestik jobasy jáne 19,2 mlrd teńge somasyna jeke ınvestıtsııa iske asyrylyp jatyr. Onyń 6,5 mlrd teńgesi memleket tarapynan ótelmeıdi.