Karantınde óndirisin bastaǵan kásiporyndar qaýipsizdik talaptaryn qalaı ustanýda
NUR-SULTAN. QazAqparat - 20 sáýirden bastap elordada ónerkásip kásiporyndary, óndiris oryndary jumystaryn qaıta jandandyra bastaǵan bolatyn. Osyǵan oraı BAQ ókilderi jumysyn bastaǵan óndiris oshaqtarynda qyzmetkerlerdiń qaýipsizdigi qalaı qamtamasyz etilip jatqanyn kórip qaıtty, dep habarlaıdy QazAqparat tilshisi.
«Qala ákimshiliginen 20 sáýirden bastap jumys isteýge ruqsat aldyq. Karantındik saqtyq sharalaryn barynsha qabyldap, jumysymyzdy bastap kettik. Jalpy óndiris ornymyzda 20-dan astam jumys isteıdi. Biraq, sanıtarlyq talaptardy eskerip, eki aýysymda 5 adamnan óndiriske shyǵyp júr. Jumysshylarymyzdy medıtsınalyq maskamen, qolǵappen, zalalsyzdandyratyn suıyqtyqpen qamtamasyz etip otyrmyz. Olar maskany aýysym barysynda úsh ret aýystyrady», - dedi elordalyq tilshiler eń aldymen at basyn tiregen «Lashyn faktorı» JShS-nyń tehnıkalyq dırektory Samat Nurmanov.
Kompanııa munaraly krandar men qurylysqa arnalǵan lıftiler qurastyrýmen aınalysady. Óndirisin endi bastaǵan kompanııa birinshi kezeńde 600 mln, ekinshi kezeńde 1 mlrd teńge ınvestıtsııa quıyp, ónimderin kórshi elderge de eksportqa shyǵarýdy josparlap otyr. Kompanııa bıikti 40, jebesi 56 metr bolatyn krandar qurastyrmaq.
«Qazaqstanda munaraly kran men óndiristik lıfti shyǵarylmaıdy. Al qurylys kompanııalarymyzdyń qajettiligi ımport esebinen qanaǵattandyrylyp otyr. Sondyqtan ıportalmastyrýshy kompanııaǵa aınalyp, elimizdiń qurylys kompanııalaryn óz ónimderimizben qamtamasyz etýdi josparlaýdamyz. Keleshekte ónimderimizdi Orta Azııa elderine, Aýǵanstanǵa eksporttaýdy da oılastyrýdamyz. Biz jylyna 100 kran qurastyra alamyz», - dedi ol.
«GLB» úı qurylys kobınaty da karantın kezinde óndiriske ruqsat berilgennen keıin jumysshylarynyń qaýipsizdigine basa nazar aýdaryp otyr. Kombınattyń baqylaý-ótkizý pýnkti kúzetshileri óndiris aýmaǵyna ár adamnyń dene qyzýyn ólshep qana ótkizedi. Sonymen qatar betke medıtsınalyq maska taǵyp, qolǵa qolǵap kııý de mindetti. Kombınattyń ár jerine zalalsyzdandyrý suıyqtyǵy qoıylǵan.
«Sanıtarlyq-epıdemıologııalyq qyzmet usynǵan barlyq qaýipsizdik talaptaryn qatań ustap otyrmyz. Kún saıyn jumysshylarymyzdy arnaıy bólingen 6 avtobýspen alyp kelip, qaıta úılerine jetkizip otyrmyz. Avtobýstar kúndelikti zalalsyzdandyrylady. Jumysshylar jıi shoǵyrlanatyn jerler kúni boıy jýylady. Buǵan qosa, zalalsyzdandyrýshy kásiporyndarmen kelisimshart jasadyq. Olar kún saıyn 2 804 sharshy metr aýmaqty zalalsyzdandyrady», - dedi «GLB» JShS-nyń basqarýshy dırektory Eldar Qasymov.
Eske sala keteıik, QR Prezıdenti janyndaǵy Tótenshe jaǵdaı rejımin qamtamasyz etý memlekettik komıssııasy 20 sáýirden bastap Nur-Sultan jáne Almaty qalalarynda jumysyn bastaıtyn kásipkerlik sýbektileriniń tizimin bekitti. Tizimde ónerkásiptik kásiporyndar, qurylys jáne jol-qurylys salalarynyń kompanııalary, iri qurylys dúkenderi, kólik, qoıma kompanııalary, aýyl sharýashylyǵy maqsatyndaǵy servıstik kompanııalar, avtosalondar, TQS, avto jýý, dóńgelek aýystyrý servısi, avtobólshekter dúkenderi, hımııalyq tazalaý, keńse tehnıkasyn jóndeý jáne ekinshi deńgeıli bankter bar.
