Karantınde qalaı kúızeliske ushyramaýǵa bolady –psıholog keńesi
ALMATY. QazAqparat – Karantın rejıminde adamdardyń oqshaýlanýy, bir saryndy ómir júıke júıesine aýyrlyq túsirgeni bar. Osyndaı jaǵdaıda qalaısha jaqsy qarym-qatynasty saqtap qalýǵa bolady? Ózińdi qalaı ustaý kerek? Ne bilý kerek? Bul suraqtarǵa psıholog Olga Shıhova QazAqparat tilshisine aıtyp berdi
Olga Shıhova jańa ómirge beıimdelýdiń ádistemesin kórsetetin «Aqyldy áıel» kitabynyń avtory.
Psıhologtyń aıtýynsha, qazir adamdardyń barlyǵy ádettegi ómir súrý rıtmi buzylǵan soń kúızeliske túsken.
Dámhanalar, balalar demalatyn jerler jabyq. Sondyqtan otbasylarda kóńil qalý, ókpe renish, kóńil tolmaýshylyq bolatyny qalypty jaǵdaı. Alaıda adamdar negatıvti oılarmen kúresýi kerek. Jaǵymsyz aqparatty ishinde jınamaýy kerek.
Sebebi adam emotsııasyn ishine jınaǵan saıyn arty iri daý-janjalǵa ákep soǵýy yqtımal.
Psıhologtyń aıtýynsha, jaǵymsyz emotsııamen kúresýge bizdiń halyqqa jeńimpaz geni kómektesedi.
«Bizdiń ata-babamyz kóp soǵysty, ashtyqty, repressııany basynan keshirgen. Barlyq synaqtan halqymyz jeńip shyqty. Biz sondaı halyqtyń urpaǵymyz. Sol úshin biz bul joly da batyrlyq tanytýymyz kerek. Barlyǵymyz sanıtarlyq talaptardy saqtaı otyryp, birge kúresemiz. Karantınniń tek jaman jaǵyn kórmeıik, jaqsy jaǵy da jeterlik», - dedi Olga Shıhova.
Onyń aıtýynsha, qazirgi sanany turmys bılegen zamanda balalarǵa ata-analarynyń sóılesýi, qarym-qatynasy jetispeıdi.
«Karantın kezinde osy olqylyqtyń ornyn toltyrýǵa múmkindik týyp otyr. Balalarmen ashyq sóılesip, birge armandap, birge bolashaqqa jospar qurý kerek. Birge fılm kórip, oıyn oınaǵan durys. Dámdi tamaq jeý de adamnyń kóńilin toltyrady. Barlyq adam balmuzdaq jaqsy kóredi. Kóterińki kóńil kúı, jaqsy emotsııa adamnyń ımmýnıtetin kóteretini anyq», - dedi ol.
