Karantınde erler áıelderge úı sharýasyna kómektesýi qajet - BUU

NUR-SULTAN. QazAqparat – COVID-19 pandemııasynyń taralýynan áıelder qashyqtan jumys isteýge ǵana emes, úı sharýasyn atqaryp, balalar men qart ata-anasyna kútim jasaýǵa mindetteldi. Osyǵan baılanysty BUU er adamdy áıelderge kómektesip, úı sharýasyn bólisýge shaqyrdy, dep habarlaıdy QazAqparat.

«Oqshaýlaný kezinde kóptegen áıelder qashyqtan nemese aýrýhanada, dúkende jumys istep, úı sharýasyn, kir jýý, tamaq ázirleý, balalar men qart ata-ana kútimin qatar alyp júrýge májbúr. Bul - áıelder men qyzdardyń ıyǵyna artylǵan jumystardyń bir bóligi ǵana. Sondyqtan, BUU erlerdi bul teńsizdikti toqtatýǵa shaqyrady», - delingen habarlamada.

Osyǵan baılanysty halyqaralyq uıym «HeForShe At Home» - «Erler úıdegi áıelderdiń quqyǵy úshin» naýqanyn bastap, balalardy, jas jigtterdi jáne erlerdi úı sharýasyn birlesip atqarýǵa shaqyrdy.

«Pandemııa saldarynan álem boıynsha mıllıondaǵan adam úıde otyr. Dál osy jaǵdaıda genderlik teńsizdik máselesi anyq kórindi. Qazirgi ýaqytta áıelder aqy tólenbeıtin úı tirligin erlerden úsh ese kóp atqaryp júr. Koronavırýspen kúreste de aldyńǵy shepte áıelder tur. Densaýlyq saqtaý men áleýmettik qyzmet jumyskerleriniń 70 paıyzy - áıelder», - dep habarlady uıym.

Sonymen birge, BUU erlerdiń óz tájirıbesin bólisip, qandaı úı sharýasyn atqaratynyn aıtyp berýin suraıdy.

«Erler áleýmettik jelide óz tájirıbesin aıtyp, ózgelerdi shabyttandyra alady. Ol úshin #HeForShe AtHome heshtegin paıdalaný qajet», - deıdi BUU.