Karantın: Jezqazǵanda ákimdik qashyqtan jumys isteýge kóship, birneshe nysan jabyldy
JEZQAZǴAN. QazAqparat – Jezqazǵan qalasynyń ákimdiginiń qyzmetkerleri qashyqtan jumys isteýge kóshti. Buǵan COVID-19 juqtyrý jaǵdaılarynyń kóbeıýi sebep boldy, dep habarlaıdy QazAqparat tilshisi.
Jezqazǵanda KVI juqtyrǵandar sany 66 adamdy qurady. Olardyń jartysyna jýyǵy «Jomart» kenishiniń qyzmetkerleri. Qazirgi tańda kásiporyn basshylyǵy bir vahtanyń jumysyn toqtatyp, epıdemııaǵa qarsy sharalardy qabldaýda.
«Jezqazǵan qalasy boıynsha koronovırýstyq ınfektsııa juqtyrǵan 66 adam tirkelgen, onyń ishinde «Jomart» kenishinen 31 adam, shet elderden kelgen stýdentter – 4, baılanysta bolǵandar Temirtaý q.boıynsha – 13, Jaryq stantsııasy boıynsha - 4, Qaraǵandy q. boıynsha - 3, psıhonevrologııalyq dıspanser bólimshesinde– 11.
Qyzmetkerler arasynda COVID 19 taralý qaýpiniń týyndaýyna baılanysty vahta 2 maýsymnan bastap jumysyn toqtatty. Barlyǵy ınfektsııalyq statsıonarǵa jatqyzyldy. Qazirgi ýaqytta aýyrǵan adamdardyń jaǵdaıy qanaǵattanarlyq, emdeý júrgizilýde. Oshaqtarda dezınfektsııalyq is-sharalar ótkizildi», - dep málimdedi Qaraǵandy oblystyq DSB Jezqazǵan aımaqtyq ókildiginiń basshysy Lıazzat Ranova.
KVI taralýyna baılanysty Jezqazǵan qalasy ákimdigi qyzmetkerleriniń de jumys formaty ózgerdi. Ákimdik shtatynyń jartysy qashyqtyqtan jumys túrine kóshti.
«Qalada azamattardyń KVI juqtyrýy ósip keledi, karantındik talaptar kúsheıtilýde. Osyǵan baılanysty Jezqazǵan qalasynyń ákimdigi qashyqtyqtan jumys isteý túrine kóshti, qyzmetkerlerdiń 50% - y ózderiniń qyzmettik mindetterin alystan (úıde oqshaýlanǵan jaǵdaıda) atqarady. Qyzmetterdiń baılanys telefondary, el.poshtalary qala ákimdiginiń saıtynda qoljetimdi: Jezkazgan.gov.kz
Ákimdik qyzmetkerleri tıisti túrde qyzmet kórsetpegen jaǵdaıda «Jezqazǵan qalasy ákiminiń apparaty« MM basshysy - memlekettik qyzmetshilerdiń ádebi jónindegi ýákili Erjan Esetovke habarlasa alasyzdar. tel: 736472», - delingen ákimdik paraqshasynda.
Sondaı-aq qalada «Júrek» otbasylyq-dárigerlik ambýlatorııa jumysy shekteldi.
«Júrek» otbasylyq-dárigerlik ambýlatorııa karatınge jabyldy. Medıtsınalyq uıym qyzmetkeriniń týysynan jasalǵan taldaýdyń oń nátıjesimen rastalǵan KVI anyqtaldy. Basqalarǵa juqtyrýǵa jol bermeý maqsatynda, medıtsınalyq mekeme karantınge jabyldy, barlyq qyzmetkerlerge tekseris jáne úı-jaılarǵa dezınfektsııalaý júrgizilýde. Búgingi kúni 63 qyzmetkerge taldaý jasaldy. Barlyq taldaýlar boıynsha KVI rastalmady, al 2 qyzmetker boıynsha áli qaralýda. Turǵyndarǵa qyzmet qashyqtyqtan kórsetiledi», - dedi ákimdik qyzmetkerleri .
Alaıda, otbasylyq-dárigerlik ambýlatorııa qyzmetkerlerine skrınıng júrgizilgennen keıin medıtsınalyq qyzmetkerlerdiń COVID-19 dıagnozy rastalmaǵany belgili boldy. Sondyqtan klınıka jeńildetilgen karantın rejıminiń maska kııý, qoldy, adamdar arasynda baılanys bolatyn zattardyń betterin dezınfektsııalaý, kire beriste temperatýra ólsheý, qashyqtyq ustaý talaptaryn saqtaı saqtaı otyryp, óz jumysyn qaıta bastady.
