Karantın jeńildetildi: 17 tamyzdan qandaı nysandar jumysyn bastaıdy

NUR-SULTAN. QazAqparat – 17 tamyzdan bastap Qazaqstan balabaqshalarynda kezekshi toptar jumys isteı bastaıdy. Bul týraly búgin Ortalyq kommýnıkatsııalar qyzmetinde ótken brıfıngide QR Bas memlekettik sanıtarlyq dárigeri Aıjan Esmaǵambetova aıtty, dep habarlaıdy QazAqparat tilshisi.

«Osy ýaqytqa deıin qyzmetine tyıym salynbaǵan nysandar dúısenbiden ári jumysyn jalǵastyra beredi. Osy nysandardan bólek, saýda jáne oıyn-saýyq ortalyqtary men saýda úıleriniń jumysy qaıta jandanady. Eger buǵan deıin saýda ortalyqtarynda dárihanalar men azyq-túlik dúkenderi ǵana jumys istese, dúısenbiden bastap saýda ortalyqtarynda býtıkterde de jumys isteı alady», - deıdi Aıjan Esmaǵambetova.

Sondaı-aq, saýda jelileri men ashyq bazarlar jumys isteı bastaıdy.

«Sonymen qatar, sulýlyq salondarynyń, sulýlyq ortalyqtarynyń, shashtarazdardyń, SPA-ortalyqtarynyń jumysyna ruqsat etiledi. Bul nysandardyń barlyǵyna qatań talaptar qoıylady. Bıznes nysandary osy talaptarǵa saı bolýy kerek. Talaptar eń aldymen, karantındi jeńildetýdiń alǵashqy kezeńderinde nysanda adamdardyń kóp jınalmaýyna, áleýmettik qashyqtyqtyń qamtamasyz etilýine baǵyttalǵan», - deıdi ol.

Eresekter men balalarǵa arnalǵan bilim berý ortalyqtary da ashylatynyn aıta ketý kerek.

«Sonymen birge, biz osy ortalyqtardyń qyzmetin shekteımiz, ıaǵnı bir topta 5 adamnan aspaýy kerek. Al sabaqtar aldyn ala jazylý, kúsheıtilgen dezınfektsııa jáne áleýmettik qashyqtyqty saqtaý arqyly júrgizilýi kerek. Mektepke deıingi mekemelerdiń jumysyna da ruqsat etiledi, birinshi kezeńde olar kezekshi toptar túrinde jumys isteıdi. Ár jasqa 15 baladan aspaıtyn kezekshi toptar qurylady», - dedi Bas memlekettik sanıtarlyq dáriger.

Budan buryn habarlanǵandaı, 13 tamyzda QR Premer-Mınıstri Asqar Mamınniń tóraǵalyǵymen ótken memlekettik komıssııa otyrysynda Karantın sharalaryn kezeń-kezeńimen alyp tastaý jospary bekitildi.