Karantın jarııalanǵaly qala kóshelerinde júrý jeńildep qaldy - jedel járdem júrgizýshisi
ShYMKENT. QazAqparat – Shymkentte karantın jarııalanǵannan beri qala kóshelerinde kólikter azaıyp, júrý jeńildep qalǵan.
Qalalyq jedel járdem stansasynyń júrgizýshisi Elmurat Mahammedov tótenshe jaǵdaı kezinde naýqastardy tasymaldaý ýaqyty azaıǵanyn aıtyp otyr, dep habarlaıdy QazAqparat tilshisi.
Jedel járdem qyzmetinde on jyldan astam ýaqyt boıy júrgizýshi bolyp jumys isteıtin Elmurat Mahammedovtyń aıtýynsha, ol tórt táýlikte bir kún kezekshilikke túsedi. Negizinen naýqastanǵan balalardy tasymaldaıtyn júrgizýshi jumysynyń ońaı emestigin jaqsy túsinedi. Al, qaýipti indet shyqqaly beri jaýapkershilik te arta túsken.
«Men negizinen balalar reanımatsııasy boıynsha dárigerlerdi tasymaldaımyn. Qazir karantın bolǵandyqtan, saqtanyp júremiz. Tańerteń jumysqa barǵanda bir rettik arnaıy kıimder kıip alamyz. Eger naýqaspen baılanysta bolǵan adamdy tasymaldasaq, onda kıimimizdi tolyqtaı aýystyramyz. Koronavırýs shyqqaly beri ýaıymdaıtyn kezderimiz bolady. Degenmen bir-birimizge qoldaý bildirip, kóńilimizdi kóterýge tyrysamyz. Qalaı degende adam ómirin saqtap qalý, olardy der kezinde aýrýhanaǵa jetkizý jaýapty mindet ekenin jaqsy túsinemiz»,- deıdi Elmurat Mahammedov.
Jedel járdem júrgizýshisi asa jaýapty jumysty bılik tarapy eskerip, ústemaqylar tólene bastaǵanyna rızashylyǵyn bildiredi. Máselen, ótken aıdaǵy jumysyna úsh balanyń ákesi qomaqty qarajat alǵan. Ony qajetine jumsaǵan jedel járdem qyzmetkeri ústemaqynyń ózin jumysqa yntalandyryp, jumysqa degen jaýapkershiligin arttyra túskenin aıtady.
«Ótken naýryz aıynda tórt ret kezekshilikke tústim. Ol jumysym úshin qosymsha 103 myń teńge tólendi. Óte rıza bolyp qaldym. Úsh balam men nemerelerimniń qajetine jumsamaqpyn. Qasymdaǵy dárigerler men feldsherler de ústemaqy alyp jatyr. Barlyǵymyz da memleketimizdiń bul qamqorlyǵyna alǵysymyzdy aıtamyz»,- deıdi Elmurat Mahammedov.
