Karantın jaǵdaıynda elorda áýejaıy qalaı jumys istep jatyr
NUR-SULTAN. QazAqparat - Elde COVID-19 indetiniń taralýyna baılanysty engizilgen karantındik sharalar barlyq salaǵa, sonyń ishinde áýe qatynasyna da áserin tıgizdi. Búginde elordadaǵy halyqaralyq áýejaı qalaı jumys isteýde, sanıtarlyq talaptar saqtalýda ma, osy jáne ózge de máseleler boıynsha QazAqparat tilshisine «Nursultan Nazarbaev halyqaralyq áýejaıynyń» basqarma tóraǵasy Ǵabıt Tájimuratov aıtyp berdi.
«Pandemııa bizdiń jumysymyzǵa keri áserin tıgizdi. Bizde 2 myńnan astam qyzmetker bar. Ár qyzmetker óz otbasynyń asyraýshysy. ıAǵnı elde karantındik jaǵdaı engizilgennen keıin, keıbir áýe reısteri jabylsa, keıbiriniń sany qysqartyldy. Jalpy bizde oryndalatyn barlyq áýe reısteri 50-70 paıyzǵa deıin qysqartyldy, degenmen elorda áýejaıy óz jumysyn toqtatqan joq. Naqtyraq aıtqanda, adam tasymalyn toqtatyp, azaıtqanymyzben, esesine júk tasymalyn arttyrdyq. Bul oraıda Nur-Sultan qalasy Eýropa men Azııany jalǵastyrýshy basty áýe tranzıti», - dedi Ǵ. Tájimuratov.
Onyń aıtýynsha, belgili bir elge nemese qalaǵa áýe reısterin qysqartý, toqtatý sol jerdegi indettik jaǵdaıǵa baılanysty júzege asyrylady.
«Jolaýshylardan PTR testin talap etý alǵash engizilgende árbir áýe reısinde 50 shaqty adamnyń tıisti anyqtamasy bolmaı shyǵatyn. Ýaqyt óte kele adamdar túsindi jáne talapqa baǵynýda. Qazir 1 reısten ári ketkende 1-2 adam PTR testi anyqtamasynsyz ushý jaǵdaıy anyqtalady. Onyń ústine bizde de jáne shetelde de jolaýshyny PTR test anyqtamasynsyz ushaqqa otyrǵyzbaý talaby qoıyldy. Sondaı-aq, jolaýshylardy yntalandyrý maqsatynda «eń tártipti reısterdi« anyqtap, ózgelerge úlgi etetin boldyq. Sońǵy ýaqytta sanıtarlyq talaptardy buzýshy qataryndaǵy jolaýshylar azaıyp keledi. Degenmen tártipke baǵynǵysy kelmeıtin jolaýshylar da joq emes. Olarmen quzyrly organ mamandary aınalysady. Bizdiń mindet barlyq sanıtarlyq talaptardy saqtaı otyryp, jolaýshylardyń qaýipsizdigin qamtamasyz etý», - deıdi ol.
Áýejaı basshysynyń sózine sensek, áýejaıda kúnine birneshe ret reıd jasalyp, sanıtarlyq jaǵdaı qadaǵalanady.
«Árbir ózin syılaıtyn adam, ortaq erejege baǵyný qajet. Bizde sanıtarlyq talaptardyń barlyǵy kórsetilip tur. ıAǵnı jolaýshy PTR test anyqtamasymen ushýǵa, araqashyqtyqty saqtaýǵa, maska taǵýǵa jáne basqa da talaptardy oryndaýǵa mindetti», - dedi Ǵ. Tájimuratov.
Odan bólek, basqarma tóraǵasy elorda áýejaıynda jolaýshylardyń dene qyzýyn ólsheıtin jańa smart-shlemniń synaqtan ótip jatqandyǵy týraly málim etti.
«COVID-19 indetiniń aldyn alý boıynsha júzege asyrylyp jatqan jańa dúnıeniń biri áýejaıda adamdardyń temperatýrasyn tekseretin teplovızory bar smart-shlem synaqtan ótkizilýde. Shlem 5 metr qashyqtyqtaǵy dene qyzýy joǵary adamdy birden anyqtap, onyń jaqyndap kele jatqanyn dabyl arqyly bildiredi. Jańa qurylǵy ázirge pılottyq joba retinde tekserilýde. Synaqtan sátti ótse, aldaǵy ýaqytta qoldanysqa engizetin bolamyz», - dedi ol.
