Karantın ýaqytynda qala shetinde demalýǵa ruqsat bar ma

NUR-SULTAN. QazAqparat – Ádilet mınıstri Marat Beketaev karantın ýaqytynda tabıǵatta nemese qala shetinde demalýǵa ruqsat baryn, alaıda adamdar kóp jınalmaý kerektigin málim etti, dep habarlaıdy QazAqparat tilshisi.

«Naqty qaı jerde demalǵyńyz keletinin aıqyndap alý kerek. Ákimdikter shekteý qoıyp tastaǵan aýmaqtar bar. Bul negizinen adamdar kóp jınalatyn oryndar – qaladaǵy jaǵajaılar, baqtar. Álbette barýǵa bolmaıtyn osyndaı orynda demalsańyz – ol zań buzýshylyq bolyp esepteledi. Jalpy tabıǵatqa shyǵýǵa bolady. Alaıda adamdar kóptep jınalmaý kerek. Eger birneshe otbasy birigip, demalǵysy kelse – onda ol karantın tártibin buzǵan bolyp esepteledi. Al bir otbasy op-ońaı qala syrtynda demala alady. Alaıda bul rette barlyq ereje saqtalýy tıis», - dedi Marat Beketaev OKQ-da ótken baspasóz máslıhatynda.

Eske sala ketsek Marat Beketaev buǵan deıin karantın tártibin saqtamaı, toı jasaǵandar qalaı jazalanatynyn aıtqan bolatyn.

«Mundaı jaǵdaıda tıisti Zań babyna sáıkes, alǵashqy jaǵdaıda aıyptalýshyǵa 83 myń teńge kóleminde aıyppul salynady. Eger mundaı sharalardyń barysynda azamattar jappaı vırýs juqtyrsa, aıyppuldyń da kólemi aıtarlyqtaı kóp bolady. Al oqıǵanyń saldary jaǵymsyz jaǵdaıǵa aparsa, qylmystyq is te qozǵalýy yqtımal», - dedi ol.