Karantın: Turmystyq zorlyq-zombylyq bolǵan jaǵdaıda qaıda júginýge bolady
Elde eńgizilgen tótenshe jaǵdaı men karantın kezinde áıelder otbasynda qatygez qarym-qatynasqa ushyraýy múmkin. BUU málimetteri boıynsha, kóptegen memlekette koronavırýs indetine baılanysty karantın sharalary eńgizilgennen keıin úıdegi zorlyq-zombylyqtyń kóbeıýi baıqalýda.
«Turmystyq zorlyq-zombylyqtan zardap shekkender úshin is-qımyl algortımi» atalatyn jadynamada kelesideı keńester berilgen:
1. Zorlyq-zombylyq týraly aýyzsha aryzben 102 nómiri boıynsha dereý polıtsııaǵa habarlasyńyz. Nemese qamqor.gov.kz portaly arqyly onlaın-aryz berińiz.
Quqyq buzýshyǵa shara qoldaný úshin polıtsııa qyzmetkerleriniń turmystyq zorlyq-zombylyq jasalǵan jerge kelýlerin talap etýge quqylysyz.
2. Jaraqat alǵan jaǵdaıda «103» nómiri boıynsha jedel járdem shaqyryńyz. Polıtsııa qyzmetkerinen sot-medıtsınalyq kýálandyrýǵa joldama alyńyz.
3. Balalarǵa, jastarǵa jáne zorlyq- zombylyq kórip otyrǵan adamdarǵa arnalǵan táýlik boıǵy ulttyq biryńǵaı senim telefondaryna (tegin): 150 nemese +77081060810 nómirine (WhatsApp) nemese www.telefon150.kz saıtyna habarlasyńyz. Ol jerde sizge psıhologııalyq jáne quqyqtyq kómek kórsetip, ýchaskelik ınspektorlardyń, daǵdarys ortalyqtarynyń jáne basqa da qajetti uıymdardyń baılanys telefondaryn beredi.
Habarlasqan adam týraly málimetterdiń qupııalylyǵyna kepildik beriledi.
4. Barlyq óńirde turmystyq zorlyq-zombylyq qurbandaryna arnalǵan daǵdarys ortalyqtary jumys isteıdi. Ómirińiz ben densaýlyǵyńyzǵa qaýip tóngen jaǵdaıda osy ortalyqtardan baspana suraı alasyz.
5. Ár aımaqta Áıelder isteri jáne otbasylyq-demografııalyq saıasat jónindegi komıssııalar jumys isteıdi. Ol jerde sizge keńes berip, qajetti qoldaý kórsetiledi.
