Karantın: Túrkistanda qoǵamdyq baqylaý kúsheıdi
Karantındik talaptardy tekserýdiń kezekti sharasy elimizdiń Aqparat jáne qoǵamdyq damý mınıstrliginiń bastamasymen ótti, dep habarlaıdy QazAqparat tilshisi.
Reıdtke shyqqan arnaıy mobıldi toptyń quramyna bul joly qala jáne aýdan polıtseıleri, ákimdik qyzmetkerleri, qalalyq taýarlar men kórsetiletin qyzmetterdiń sapasy men qaýipsizdigin baqylaý basqarmasy men kásipkerlik palatasynyń qyzmetkerleri qatysty.
Shahardaǵy dúkender men kópshilik tamaqtanatyn oryndardy aralaý barysynda kásipkerlik nysandardaǵy karantındik talaptardyń saqtala bermeıtini anyqtaldy. Máselen, azyq-túlik dúkenderinde satýshylar da alýshylar da betperde taqpaıdy, kireberiste antıseptıkalyq suıyqtyqtar qoıylmaıdy. Dál osyndaı jaǵdaı dámhanalar men meıramhanalarda da qalyptasqan.
Onda kelýshilerdi otyrǵyzýda ara qashyqtyqtyń saqtalmaıtyny, daıashylar men ákimshilik qyzmetkerleri jáne kelgen qonaqtar da betperdesiz júrgeni anyqtaldy. Karantındik talaptarǵa saı nysandardy ýaqtyly jabý boıynsha da kemshilikter tirkeldi.
Aıta keteıik, buǵan deıin óńirde 217 adam otbasylyq toı-jıyn ótkizip, uıymdastyrǵany úshin jaýapqa tartylǵan bolatyn. Olardyń arasynda 64-i «Betashar» bolsa, 36-y «Qyz uzatý» toılary tirkelgen. Al, polıtseılerdiń aıtýynsha, oblysta shekteý sharalaryna qaramastan erejeni elemeıtinder qatary kóbeıip otyr.
Jalpy, búgingi kúnge deıin Túrkistan oblysynyń polıtseıleri QR ÁQBtK-niń 425-babymen «Halyqtyq sanıtarııalyq-epıdemıologııalyq, gıgıenalyq talaptaryn buzý» boıynsha 2889 jaıtyn tirkep, ákimshilik hattamalardy sotqa ótkizgen.
