Karantın tártibin buzýdyń myńnan astam deregi anyqtaldy - Almaty oblysy
TALDYQORǴAN. QazAqparat - Almaty oblysynyń polıtsııa qyzmetkerleri sanıtarlyq-epıdemıologııalyq normalardyń buzylýyn anyqtaýda. Barlyq tyıymdarǵa qaramastan, oblys turǵyndary toppen jınalyp, jappaı is-sharalar ótkizýdi jalǵastyrýda, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, tekserý kezinde saýda oryndarynda jáne ártúrli salondarda sanıtaızerler men basqa da gıgıenalyq zattar joq ekenin kórsetti.
Sonymen qatar, betperde taǵý tártibin buzý derekteri de jıi kezdesedi.
«Karantın engizilgennen bastap quramyna jergilikti polıtsııa qyzmeti qyzmetkerleri engen monıtorıng toptary osyǵan uqsas buzýshylyqtardy anyqtaý boıynsha reıdtik is-sharalar júrgizýde. Tek bir aptada karantındi buzýdyń 83 faktisi anyqtaldy. Olardyń negizgi úlesi saýda úılerinde, sulýlyq salondarynda jáne oıyn klýbtarynda sanıtarlyq zattardyń bolmaýynyń enshisinde. Medıtsınalyq betperde kııýdi elemeıtin azamattar tarapynan da buzýshylyqtar bar. Jalpy karantın bastalǵannan beri 1003 buzýshylyq anyqtaldy. Barlyq anyqtalǵan karantındik normalardy saqtamaý faktileri boıynsha tıisti hattamalar toltyryldy», - dedi Almaty oblysy PD JPQB bastyǵy polıtsııa polkovnıgi Baǵdat Áshimov.
Oblys aýmaǵynda karantınniń buzylýyn anyqtaý úshin arnaıy qurylǵan mobıldi toptar jumys isteıdi. Tek oblys ortalyǵynda demalys kúnderi engizilgen lokdaýnǵa nemquraıly qarap, is-sharany ótkizýdiń 3 deregi tirkeldi. Oıyn-saýyq mekemeleriniń ıeleri jaýapkershilikke tartyldy. Sondaı-aq kelýshilerge qatysty ákimshilik sıpattaǵy sharalar qabyldanýda.
«Jalpy alǵanda oblys boıynsha quramyna polıtsııa qyzmetkerleri, jergilikti atqarýshy organdar men sanıtarlyq-epıdemıologııalyq qyzmet ókilderi kiretin 35 monıtorıngtik top jumys isteıdi. Olar karantın normalarynyń buzylýyn anyqtaý boıynsha táýlik boıy jumys júrgizýde», - dedi polkovnık Áshimov.
