Karantın: Tarazda sheteldikterge qyzmet kórsetken shashtaraz ustaldy
TARAZ. QazAqparat –Taraz qalasynda tótenshe jaǵdaı talaptaryn buzyp, jumys istegen sulýlyq salony anyqtaldy, dep habarlaıdy QazAqparat.
Tarazdaǵy sulýlyq salondarynyń biriniń 25 jastaǵy shashtaraz sheberi tótenshe jaǵdaı rejımine qaramastan, jergilikti joǵary oqý oryndarynda bilim alyp jatqan Túrkimenstannyń bes azamatynyń shashyn qııýǵa kelisken.
Atalǵan quqyq buzýshylyqty polıtsııa qyzmetkerleri jaıaý patrýldeý kezinde anyqtady. Bul týraly oblystyq polıtsııa departamentiniń baspasóz qyzmeti habarlady.
«Tótenshe jaǵdaı rejımin buzǵany úshin shashtarazdyń ıesine, sheberge jáne bes azamatqa qatysty QR ÁQBtK-niń 476-baby boıynsha ákimshilik hattamalar toltyryldy. Qyzmet kórsetý kezinde sheber men tutynýshy arasynda jaqyn jáne uzaqqa sozylatyn baılanystyń bolýyna baılanysty karantın kezinde mundaı kásiporyndardyń qyzmetine qatań tyıym salynady»,-delingen vedomstvo málimdemesinde.
Qazirgi ýaqytta polıtsııa qyzmetkerleri karantın rejımin buzǵandardy anyqtaýdy jalǵastyrýda.
Tótenshe jaǵdaı kezinde oblys boıynsha barlyǵy 886 ákimshilik quqyq buzýshylyq tirkeldi. Quqyq buzýshylarǵa 186 eskertý berilip, 250 adamǵa 10 AEK kóleminde ákimshilik aıyppul salyndy, 79 derek boıynsha ákimshilik qamaýǵa alyndy, al qalǵan materıaldar sotqa jiberildi.
Jambyl oblysynyń Polıtsııa departamenti azamattardan TJ rejımin saqtaýdy jáne basqa adamdar buzǵan jaǵdaıda habarlaýdy suraıdy.
foto: poprofessii.in.ua