Karantın talaptarynyń saqtalýyn baqylaıtyn toptar 90 myńǵa jýyq reıd júrgizdi - QR DSM

NUR-SULTAN. QazAqparat - Jyl basynan beri mobıldik toptar júrgizgen jumystyń qorytyndysy boıynsha Qazaqstanda karantın talaptaryn buzǵany úshin 9 myńǵa jýyq kásipkerlik nysanyna jáne 7 myńǵa jýyq jeke tulǵaǵa ákimshilik aıyppul salyndy.

Bul týraly QazAqparat QR Densaýlyq saqtaý mınıstrliginiń Sanıtarııalyq-epıdemıologııalyq baqylaý komıtetine silteme jasap habarlaıdy.

Aǵymdaǵy jyldyń 1 qańtary men 24 mamyry aralyǵynda karantın talaptarynyń saqtalýyn baqylaıtyn toptar 89 829 reıd júrgizdi. Atalǵan is-sharalarmen 559 001 nysan qamtyldy. Tekserý nátıjesinde shekteý talaptaryn buzǵan 15 679 nysan anyqtaldy.

Karantın tártibin jıi buzatyn kásipkerlerdiń bestiginde Shyǵys Qazaqstan (3871 nysan), Túrkistan (2442 nysan), Almaty (1003 nysan) oblystary men Almaty (2163 nysan) jáne Shymkent (1700 nysan) qalalarynyń bıznes sýbektileri bar.

Sondaı-aq, monıtorıng toptary 2 769 jospardan tys tekserý júrgizip, 2 546 uıǵarym berdi, sotqa 292 materıal berilip, 75 nysannyń qyzmeti ýaqytsha toqtatyldy.

«8 946 nysanǵa jáne 6 696 jeke tulǵaǵa jalpy somasy 1,2 mlrd teńgeden asatyn ákimshilik aıyppul salyndy»,-delingen habarlamada.