Karantın talaptaryna baǵynǵysy kelmeıtin shymkenttikterge eskertý jasaldy
Qarataý aýdandyq taýarlar men kórsetiletin qyzmetterdiń sapasy men qaýipsizdigin baqylaý basqarmasynyń mamandarynan qurylǵan monıtorıngilik top dámhanalardy aralap, onda kelýshiler men qyzmetshiler betperdesiz júrgenin anyqtady. Sondaı-aq qyzmet kórsetýshi ákimshiler arnaıy kıim kımegen. Mekeme qojaıyndaryna eskertý jasaldy.
Qalanyń ortalyǵynda ornalasqan «Nursát» móltek aýdanyndaǵy dúkenderde kelýshiler de maskasyz saýda jasap júrgeni belgili boldy. Sondaı-aq, saýda nysandaryna kireberiste antıseptık suıyqtyqtary qoıylmaǵan, tazalyq talaptary da saqtalmaǵan. Al, keıbir nysandarda adamdardyń dene qyzýyn ólsheıtin quraldar joq bolyp shyqty.
Monıtorıngilik top músheleri bul jolǵy tekserý barysynda kásipkerlerge eskertý jasaýmen shekteldi. Olarǵa túsindirme jumystary júrgizilip, karantın talaptaryn saqtaý kerektigin aıtty.
«Kásipkerlik nysandarda kemshilikter joq emes, bar. Eń jıi kezdesetin kemshilikter qatarynda betperde taqpaý men birrettik qolǵap kımeý bolyp otyr. «Kún ystyq, qulaǵymyzdy qıyp ketedi» dep jaýap berýde. Biraq soǵan qaramastan, barlyq azamattar sanıtarlyq talaptardy saqtaý kerek. Ondaı azamattarmen túsindirý jumystary júrgizilýde. Endigi joly sol kemshilikter qaıtalanatyn bolsa, olarǵa qatysty 462-baptyń 3-tarmaǵymen ákimshilik hattama toltyrylatyn bolady. Sóıtip materıaldar sotqa ótkiziledi»,- dedi Shymkent qalasy Qarataý aýdandyq taýarlar men kórsetiletin qyzmetterdiń sapasy men qaýipsizdigin baqylaý basqarmasy basshysynyń orynbasary Aınur Perneeva.
