Karantın talaptaryn saqtamaǵandarǵa 100 mln teńge aıyppul salyndy – Túrkistan
TÚRKІSTAN. QazAqparat – Túrkistan oblysynda karantın talaptaryn saqtamaǵandarǵa 100 mln teńgeden astam aıyppul salynǵan. Bul týraly oblystyń bas memlekettik sanıtarııalyq dárigeri Nurbek Nyshanov málimdedi, dep habarlaıdy QazAqparat tilshisi.
Nurbek Nyshanovtyń aıtýynsha, óńirde 5 shilde men 1 qyrkúıek aralyǵynda 53 mobıldi toptarmen karantın rejımi kezinde qyzmetin júzege asyratyn nysandarǵa monıtorıngileý jumystary júrgizilgen. Reıd jumystarynyń nátıjesi boıynsha 19 489 nysan tekserilip, karantın talaptaryn buzǵan 2181 nysan anyqtalǵan. 2097 jeke tulǵaǵa 30 AEK kóleminde, 67 jeke kásipker men 7 zańdy tulǵaǵa, 10 laýazymdy tulǵaǵa 230 AEK kóleminde aıyppul salynǵan. Zańbuzýshylarǵa ákimshilik quqyq buzýshylyq týraly 2181 hattama toltyrylyp, 114 mln 217 470 teńge kóleminde aıyppul salynǵan. Búgingi kúnge onyń 87 mln teńgege jýyǵy óndirilgen.
«Karantın kezinde oblys aýmaǵynda 41 betashar, 6 kelin túsirý, 23 qyz uzatý, 5 qudaıy tamaq, 16 qudalyq, 5 besik toı, 2 tusaý keser jáne súndet toı, 10 ujymdyq jıyn, jalpy 108 otbasylyq, merekelik is-sharalar anyqtalyp, toqtatyldy. Túrkistan oblysy boıynsha 1 qyrkúıekke deıin qyzmetin qaıta bastaýǵa InfoKazakhstan.kz saıty arqyly sanıtarlyq normalarǵa sáıkestik aktisin alýǵa atalǵan portalǵa 27 410 ótinish kelip túsken. Sonyń ishinde 23 617 nysanǵa habarlama berý arqyly ruqsat berilse, 165 nysandy kórip tekserý arqyly ruqsat berildi. 1220 ótinishti qanaǵattandyrýdan bas tartylǵan jáne 75 nysan qaralýda»,- dedi Nurbek Nyshanov.
