Karantın talaptary: Nur-Sultanda oıyn-saýyq ortalyqtary, meıramhanalar, kafeler tekserildi
NUR-SULTAN. QazAqparat - Elorda ákimdiginiń mobıldi toby polıtsııa, SES qyzmetkerlerimen jáne eriktilermen birlesip, Nur-Sultan qalasynyń bas sanıtarlyq dárigeriniń qaýlysynyń saqtalýyn tekserý úshin kezekti monıtorıng júrgizdi, dep habarlaıdy qalalyq ákimdiktiń baspasóz qyzmeti.
Monıtorıngtik is-sharalar barysynda saýda-oıyn-saýyq ortalyqtary, meıramhanalar, kafeler sekildi nysandar tekserildi. Nysandar sanıtarlyq-epıdemıologııalyq qatań talaptardy ustanýy mindetti.
«Sannormalar saqtalmaıtyn, sondaı-aq adam kóp jınalatyn oryndar koronavırýs ınfektsııasynyń taralýynda joǵary qaýip týdyratyny belgili. Túsindirý jumystary júrgizildi. Negizgi ereje — sanıtarlyq normalardy qatań saqtaý. Nysandardyń kireberisinde sanıtaızerler ornatylýy kerek, al qyzmetkerler men kelýshiler betperde kııýi qajet. 1,5-2 metr qashyqtyqty saqtaý mańyzdy. Sanıtarlyq normalardyń saqtalýyn baqylaý jónindegi mobıldik toptar óz jumysyn ary qaraı da jalǵastyra beredi», — dep atap ótti Investıtsııalar jáne kásipkerlikti damytý basqarmasy saýda jáne qyzmet kórsetý salasyn damytý bóliminiń basshysy Rýslan Ydyrysov.
Esterińizge sala keteıik, Nur-Sultan qalasynyń Bas memlekettik sanıtarlyq dárigeriniń qaýlysyna sáıkes saýda ortalyqtary jumys kúnderi 22.00-ge deıin isteıdi, al demalys kúnderi jumys istemeıdi. Budan basqa, meıramhanalar men dámhanalar jumys kúnderi jáne demalys kúnderi 20.00-ge deıin (30 otyratyn orynnan aspaýy kerek) qyzmet kórsetedi. Maska rejımi saqtalýy tıis.
Aıta keteıik, elorda koronavırýs boıynsha «qyzyl» aımaqqa enip ketti.
