Karantın talabyn buzǵandarǵa jazany qatańdatý kerek - Memleket basshysy
NUR-SULTAN. QazAqparat - Nur-Sultan men Almatyǵa jaıaý kirýge de jol bermeý kerek. Bul týraly Aqordada Tótenshe jaǵdaı jónindegi memlekettik komıssııanyń otyrysyn ótkizgen QR Prezıdenti Qasym-Jomart Toqaev aıtty, dep habarlaıdy QazAqparat tilshisi.
«Qazirgi ýaqytta álemde aýrýdyń jańa jaǵdaılarynyń eń kóp sany qatań karantın sharalaryn tym kesh engizgen elderde tirkelip jatyr. Infektsııanyń sel sııaqty taralýynyń aldyn alý úshin oqshaýlaý sharalaryn kúsheıtý qajet. Ózge elderdiń oń jáne teris tájirıbelerine qatysty únemi túsip jatqan aqparattardy eskere otyryp, medıtsınalyq júıemizdi jaǵdaıdyń odan ary órbýiniń kez kelgen nusqasyna daıyndyq jalǵastyrý qajet. Kóńildi jaılandyryp, qoldan kelgenniń barlyǵyn jasadyq deýge bolmaıdy. Elorda men Almatyda karantındik aýmaqty tolyqtaı qorshaýdy qamtamasyz etý, qalaǵa jaıaý kirý múmkindikteriniń jolyn kesý mańyzdy. Taıaý ýaqytta ózge de iri eldi mekenderdi jabý qajettigin aıqyndaý kerek», - dedi Memleket basshysy.
Qazaqstan Prezıdenti karantınge jatqyzylǵan adamdarǵa qoıylatyn talaptardy buzǵandarǵa jazany kúsheıtý qajettigi týyndap otyrǵandyǵyn da basa aıtty.
«Azamattardyń qaýipsizdigin qamtamasyz etý úshin meniń Jarlyǵymmen adamdar jappaı jınalatyn nysandardyń jumysy shektelip, túrli sharalar ótkizýge tyıym salyndy. Degenmen, shekteýdiń jıi buzylatyndyǵyn da kórip otyrmyn. Osy jyldyń 16 naýryzynan beri Aqmola, Atyraý, Shyǵys Qazaqstan, Qaraǵandy, Qostanaı, Pavlodar, Soltústik Qazaqstan jáne Túrkistan oblystaryn qosa alǵanda tótenshe jaǵdaı rejimin buzýdyń 18 faktisi oryn aldy. Kináli tulǵalar eskertý nemese aıyppul túrindegi ákimshilik jaýapkershilikke tartyldy. Barynsha qatań santsııalarǵa kóshetin kez keldi. Sonymen qatar mundaı faktilerdi aldyn alý maqsatynda BAQ-ta keńinen jarııalaý qajet», - dedi Qasym-Jomart Toqaev.
