13:00, 07 Qańtar 2021 | GMT +5
Karantın talabyn buzǵandar týraly qaıda shaǵymdanýǵa bolady
ALMATY. QazAqparat – Almaty turǵyndary karantın talaptaryn buzý derekterine kýá bolsa, tıisti organdarǵa shaǵymdana alady. Bul týraly Almaty sanıtarııalyq-epıdemıologııalyq baqylaý departamentiniń basshysy, qalanyń bas memlekettik sanıtar dárigeri Jandarbek Bekshın onlaın brıfıng barysynda aıtty, dep habarlaıdy QazAqparat tilshisi.

«Bizde koronavırýs ınfektsııasynyń taralýynyń aldyn alý úshin arnaıy shtab qurylǵan. Bul shtab aýdandyq ákimdikter janyndaǵy monıtorıng toptarynyń jumysyn úılestirip otyrady. Bizde qalada 32 monıtorıng toby bar. Olar kúnde adam kóp jınalatyn nysandardy tekseredi. Adamdar osyndaı zańbuzýshylyqtyń kýási bolsa, shtabqa jibere alady. Odan bólek bizde saıt bar», - dedi Bekshın.
Almaty sanıtarııalyq-epıdemıologııalyq baqylaý departamentiniń saıtynda monıtorıng toptarynyń telefon nómirleri de jarııalanǵan.
Odan bólek azamattar 1308 nómirine habarlasa alady.