Karantın talabyn buzǵan 335 elordalyq kásipker jaýapkershilikke tartyldy

NUR-SULTAN. QazAqparat – Elordada karantın talabyn saqtamaǵany úshin sottyń sheshimimen 26 nysannyń qyzmeti toqtatyldy. Bul týraly Úkimet otyrysynda Nur-Sultan qalasynyń ákimi Altaı Kólginov aıtty, dep habarlaıdy QazAqparat tilshisi.

«Elordada zerthanalar sany 2-den 24-ke deıin ulǵaıtyldy. Onda táýligine 13 myńnan astam test júrgizýge múmkindik bar. Qazirgi tańda barlyǵy 1 mıllıonnan astam testileý júrgizildi. Qazirgi kúni ortasha eseppen alǵanda táýligine 3 myńnan 6 myńǵa deıin zertteý júrgizilýde. Bul turǵyndar arasynda koronavırýsty anyqtaý deńgeıin edáýir arttyrýǵa múmkindik berdi», - deıdi Nur-Sultan qalasynyń ákimi Altaı Kólginov.

Onyń aıtýynsha, PTR anyqtamalary joq halyqaralyq reısterdiń barlyq jolaýshylary karantındik statsıonarlarǵa ornalastyrylýda. Mysaly, tek 14 naýryzda 4 halyqaralyq reıs qabyldandy. onda 170 azamattyń PTR test anyqtamasy bolǵan joq.

«Koronavırýs indetine qatysty vaktsına egý jalǵasýda. Arnaıy kabınetter, vaktsına alǵannan keıin patsıentterdi baqylaýǵa arnalǵan zaldar shtattyq redımde jumys jasaýda. Qazirdiń ózinde 620 medıtsına qyzmetkerleri, pedagogtar, quqyq qorǵaý organdary men dıplomatııalyq korpýs qyzmetkerleri jáne sozylmaly aýrýlary bar adamdar vaktsına aldy», - deıdi ol.

Sondaı-aq, qala ákimi kún saıynǵy, ásirese demalys, mereke kúnderi karantın sharalarynyń saqtalýyn baqylaıtyn monıtorıngtik toptardyń jumysy kúsheıtilgenin aıtty. Nátıjesinde 77 mln teńge somasynda 335 zańdy tulǵa ákimshilik jaýapkershilikke tartyldy. Sottyń sheshimimen 26 nysannyń qyzmeti toqtatyldy. Atalǵan jumys jalǵasýda jáne qatań baqylaýda.