Karantın: Sheteldik týrıster úshin Qazaqstanda saıahattaýdyń qandaı joly bar

NUR-SULTAN. QazAqparat – Karantın talaptary men shekteýlerge baılanysty syrttan keletin týrısterdiń elimizde qalaı saıahattaı alatyny belgili boldy, dep habarlaıdy QazAqparat tilshisi.

«Ózderińiz biletindeı, búginde Ashyq jobasy arqyly kınoteatrǵa, dámhana men meıramhanalarǵa barý múmkindigi týdy. Ol úshin atalǵan qosymshanyń kómegimen JSN terip jáne QR kodty skaner jasasańyz, jetip jatyr. Degenmen shetelden kelýshiler Ashyq jobasyn qoldana almaıdy, sebebi onda shetel azamattary týraly málimet joq. Osy oraıda syrt elden kelgen týrıster eQonaq aqparattyq júıesi arqyly Qazaqstanda emin-erkin saıahattaı alady. Sol arqyly sheteldik týrısterdiń qaı jerde toqtaǵanyn ǵana emes, olardyń qaı jerlerde saıahattap júrgeni týraly aqparat ala alamyz. Al bul óz kezeginde týrızm salasyndaǵy ınfraqurylymdy josparlaý men jetildirýde mańyzdy sanalady», - deıdi «Kazakh Tourism» ulttyq kompanııasy» AQ basqarma tóraǵasy Erjan Erkinbaev.

Buǵan deıin ulttyq kompanııa basshysy týrısterge arnalǵan eQonaq aqparattyq júıesiniń jumysy týraly aıtyp bergen bolatyn.

Aıta keteıik, búgin elordada atalǵan aqparattyq júıeniń tanystyrylymy ótti.

Jańa joba ishki týrızm salasyn damytýdyń 2019-2025 jyldarǵa arnalǵan memlekettik baǵdarlamasy aıasynda ázirlendi.