Karantın shekteýlerin jıi buzatyn óńirler belgili boldy

NUR-SULTAN. QazAqparat – Densaýlyq saqtaý mınıstri Alekseı Tsoı karantın shekteýlerin jıi buzatyn óńirlerdi atady, dep habarlaıdy QazAqparat tilshisi.

«Halyq arasynda vırýstyń qaýiptiligine senbeıtin adamdar bar, olar úılený toılaryn, banketterdi jeke úıler men kottedjderde ótkizýdi jalǵastyryp keledi. Monıtorıng toptarynyń engizilgen shekteý sharalary men eskertýlerine qaramastan, sanıtarııalyq-epıdemıologııalyq talaptardy saqtamaı jumys istep turǵan nysyndardy anyqtaý jalǵasýda», - dedi mınıstr Ortalyq kommýnıkatsııalar qyzmetinde.

Onyń aıtýynsha, naýryzda shekteý is-sharalaryn, karantın talaptarynyń saqtalýyn baqylaý maqsatynda 16 030 reıd júrgizildi.

«Osy oraıda 102 966 nysan tekserildi, onyń ishinde 2864 nysan ákimshilik sharalarǵa qaramastan, belgilengen shekteý talaptaryn, jumys rejımin buzýdy jalǵastyryp keledi, ıaǵnı buqaralyq is-sharalar ótkizip jatyr. 3021 ákimshilik is qozǵaldy», - dedi A.Tsoı.

Onyń sózine qaraǵanda, mundaı nysandar myna óńirlerde kóp tirkeldi: Shyǵys Qazaqstan oblysynda, Almaty qalasynda, Shymkent qalasynda anyqtaldy.

«Búgingi tańda elimizde karantındik sharalardy qasaqana buzǵan 512 adam anyqtaldy. Óńirler boıynsha Shymkent qalasy, Nur-Sultan qalasy, Almaty qalasy, Jambyl oblysy, Qostanaı oblysy, Pavlodar oblysy kósh bastap tur. 512 quqyq buzýshynyń arasynda 486-sy shaǵyn bıznes ókili, tórteýi orta kásipkerlik nysany jáne 22 jeke tulǵa bar», - dep naqtylady mınıstr.