Karantın shekteýleri jeńildetilmeıdi - Janna Pirálıeva
NUR-SULTAN. QazAqparat – Elordada karantın sharalardy jeńildetý múmkin bolmaı tur. Bul týraly Nur-Sultan qalasynyń bas sanıtarlyq dárigeri Janna Pirálıeva málim etti, dep habarlaıdy QazAqparat tilshisi.
«COVID belgileri bar pnevmonııaǵa shaldyǵýǵa qatysty monıtorıng júrgizilýde. 4 qarashadaǵy jaǵdaı boıynsha COVID -19 belgileri bar pnevmonııanyń (U07.2) 596 oqıǵasy tirkeldi. Sońǵy 5 aptada kúnine 5 jaǵdaıǵa deıin tirkelýde. Qazan men qarasha aılarynda indet juqtyrý kórsetkishiniń artýyna baılanysty qalada karantındik sharalardy jeńildetý múmkin bolmaı tur», - dedi J. Pirálıeva onlaın rejımde ótken koronavırýs ınfektsııasynyń aldyn alý sharalary boıynsha baspasóz máslıhatynda.
Sonymen qatar ol shetelden jáne elimizdiń óńirlerinen kelgen adamdarǵa monıtorıng júrgizilip jatqanyn atap ótti.
«2020 jylǵy 2 qazan men 4 qarasha aralyǵynda 162 reısten 18 860 adam keldi. Onyń ishinde 15 736 adamda PTR teris nátıjesi bar anyqtama boldy, 3110-y karantındik statsıonarǵa jatqyzyldy jáne tekserildi, 14 adam deportatsııalandy, aýrýdyń sımptomsyz túrimen 7 adam anyqtaldy», - dedi bas sanıtarlyq dáriger.
Budan buryn habarlanǵandaı, Janna Pirálıeva qaladaǵy epıdemıologııalyq ahýal jaıynda baıandady.
