Karantın sharalaryn qatań ustansaq qana indetten qutylamyz – Memleket basshysy
NUR-SULTAN. QazAqparat – Karantın rejımi buzylsa, koronavırýsqa shaldyqqandardyń sany kúrt kóbeıip ketýi múmkin. Bul týraly QR Prezıdenti Qasym-Jomart Toqaevtyń málimdemesinde atalyp ótti, dep habarlaıdy QazAqparat.
«Halqymyzda «Tózim tilekke jetkizedi» degen maqal bar. Sondyqtan sabyr saqtaıyq. Kúnniń jylynýy men karantınnen sharshaǵandyq jaýapsyzdyqqa sebep bolmaýǵa tıis. Karantın rejımi buzylsa, koronavırýsqa shaldyqqandardyń sany kúrt kóbeıip ketýi múmkin. Ásirese, sozylmaly aýrýy bar jáne egde adamdar erekshe saq bolýy kerek. Tipti, kishkentaı balalar da aýrý juqtyrýy múmkin ekenin baıqadyq. Sondyqtan olardyń densaýlyǵyna beı-jaı qaraýǵa bolmaıdy», - dedi Memleket basshysy.
Osy oraıda Prezıdent ázirge bul vırýstyń vaktsınasy joq ekenin eske saldy.
«Karantın sharalaryn qatań ustansaq qana indetten qutylamyz. Asa qajettilik bolmasa, eshqaıda shyqpaı, úıde otyryńyzdar. Bul, ásirese, qazirgi qasıetti Ramazan aıynda óte mańyzdy. Osy kezeńniń de asyl muraty – shydam men tózim, sabyr men qanaǵat ekenin bilesizder. Bıyl Qazaqstan musylmandary dinı basqarmasy Orazada birqatar rásimnen tartynýdy usyndy. Sondyqtan osyndaı ýaqytta aýyzashardyń ózin kópshilikpen birge ótkize almaıtynymyz belgili», - dedi Qasym-Jomart Toqaev.
