Karantın sharalary kásipkerlerge qalaı áser etti

NUR-SULTAN. QazAqparat - «Atameken» ulttyq kásipkerler palatasynyń basqarma tóraǵasy Abylaı Myrzahmetov Tótenshe jaǵdaı kezinde kásipkerlerdiń qandaı qıyndyqtarǵa ushyraǵanyn aıtyp berdi, dep habarlaıdy QazAqparat tilshisi.

«Biz bastapqydan bıznestiń pýlsin seziný úshin anketa jasaý tásilin engizdik. Búgingi kúnge deıin 40 myń adam júgindi. Elimizde 1,6 mln adamnyń bıznesi qyzmet kórsetý, týrızm, meıramhanalar men dámhanalar jelisimen baılanysty. Elimizde 856 myń jeke kásipker bar. Mıllıonǵa jýyq mıkrobıznes ókilderi, 1168 iri bıznes sýbektileri bar. Bes myńnan astam orta bıznes, eki myńnan astam shaǵyn bıznes bar. ıAǵnı, jalpy eseppen bir mıllıon sýbekt karantın saldarynan zardap shekti», - dedi A. Myrzahmetov onlaın suhbat barysynda.

Ótinimderdiń 85 paıyzy tabysynan aıyrylǵan shaǵyn jáne orta bıznes ókilderinen túsken.

«Mıkrobıznestiń 50 paıyzy qyzmetkerlerin demalysqa jiberýge májbúr bolǵanyn jazdy. 20 paıyzynyń jospary buzylyp, jumysshylaryn qysqartýǵa jiberedi. Mıkrobıznes jaldaý qunyn tóleý, salyq, nesıe máselelerin kóterdi. Bank júıesinde 20 myń zańdy tulǵanyń nesıesi bar. 14-15 myńǵa jýyq kásipker nesıeni keıinge qaldyrýǵa ótinim berip, 86 paıyzynyń ótinishi maquldandy. Alǵashqy aptalarda túsinistik tanytpady degen shaǵymdar boldy. Biraq, keıinirek bári jolǵa qoıyldy. Mundaǵy basty másele - suranys daǵdarysy. Bul barlyq bızneske qatysty. Suranystyń qanshalyqty tómendegenin baǵalaý óte mańyzdy bolyp otyr», - dedi spıker.

Onyń aıtýynsha, memleket tarapynan óte jyldam kómek kórsetildi.

«Memleket qoldaý kórsetý boıynsha birden iske kiristi. Ekonomıkaǵa biraz kedergi bolsa da, indettiń aldyn alýda shapshań qımyldady. Munyń barlyǵy aqtaldy, óıtkeni halyqtyń qaýipsizdigi bárinen mańyzdy. Salyq boıynsha jeńildikter birden qarastyryldy. Shaǵyn jáne orta bıznestiń artyq qarajaty joq edi. Árıne, eń aldymen solarǵa kómek qajet boldy», - dedi A. Myrzahmetov.