Karantın sharalary der kezinde engizildi - Jabal Erǵalıev
KÓKShETAÝ. QazAqparat – Prezıdent pármenimen osy bir karantındik shekteý kezinde halyqtyń turmys jaǵynan qınalyp qalmaýy úshin bar jaǵdaı jasaldy. Mundaı pikirdi Qazaqstannyń eńbek sińirgen qaıratkeri Jabal Erǵalıev bildirdi, dep habarlaıdy QazAqparat tilshisi.
«Barlyq qazaqstandyqtar ótken aptadan beri Memleket basshysy Qasym-Jomart Toqaevtyń málimdemesin asyǵa kútken bolatyn. Endi mine, sol málimde jarııalandy! Baıyppen zer sala, jedel tanysyp shyqtym. Halyqtyń barlyǵy da solaı jasaǵan bolar. Óıtkeni, biz Prezıdentimizdiń osy málimdemesinen jaqsy habar, aldaǵy kúnderde ne isteý qajet degen pármendi usynystardy kúttik jáne indetke qarsy kúreste taǵy da ózimizdiń tirshiligimiz ben bylaısha aıtqanda óz ómirimizdi qalaı uıymdastyramyz degen oı qorytyndysyn jasaýǵa da yntaly edik», - deıdi J.Erǵalıev.
Sonymen qatar, ol qazir qazaqstandyqtardyń indetke qarsy kúreste Prezıdenttiń ár málimdemesin basshylyqqa alatynyn aıtýda. Jáne de halyq osy bir syndarly da kúrdeli sátte Prezıdentti ózderiniń senimdi bir qorǵany men panasy esebinde sezinip otyrǵandyǵyn alǵa tartýda.
«Qasym-Jomart Kemeluly bul jolǵy málimdemesinde elimizde tótenshe jaǵdaı jarııalanǵan 16 naýryzdan bastap elimizde qandaı ister atqarylǵandyǵyn aıtty. Rasynda karantın jarııalanǵany óte oryndy boldy! Óıtpegende indet jappaı tarap, onyń aqyry da durys bolmas edi. Karantın kezeńiniń jurtshylyqqa ońaı tımegendigin de Prezıdent bilip, sony ózi aıtyp otyr. Biz buǵan túsinistikpen qaraımyz. El basyna kún týmas pa, kún týǵan shaqta basqa túsken isti «kóppen kórgen uly toı» deıtin, bárine de bekemdenip kónetin jáne de sabyr men tártip saqtap bárin de aman-saý jeńetin halyqtyń urpaǵy emes pe edik?! Jáne de Prezıdent pármenimen osy bir karantındik shekteý kezinde halyqtyń turmys jaǵynan qınalyp qalmaýy úshin bar jaǵdaı jasaldy, jasalyp ta jatqandyǵy eldiń óz bıligine degen senimin de nyǵaıta tústi. Jalpy osy bir indetti kezeń bárimizdi de shıratyp, tipti halyq pen bıliktiń arasyn jaqyndatyp, bir-birine baýyr basýlaryna yqpal etti me deımin», - dep tolyqtyrdy J.Erǵalıev.
Ol atap ótkendeı, Prezıdent óz málimdemesinde búgingi kúnge deıin Qazaqstan boıynsha 4 mıllıon 250 myń azamatqa qarjylaı kómek, 570 myńnan astam adamǵa azyq-túlik berilgendigin aıtty. Jumystary toqtap, kúnkóristeriniń napaqasyn taýyp otyrǵandar úılerinde otyryp qalǵandardyń árqaısysyna 42500 teńgeden berilýi halyqty qýantyp ta, senimderin nyǵaıtyp tastaǵandyǵyndyǵy belgili.
«Memleket basshysy óz málimdemesinde sáýir-mamyr aılarynda 1,6 mıllıonnan astam adamǵa kommýnaldyq tólem kómegi kórsetiletindigin aıtty. Elimizde karantın jarııalanǵan alǵashqy kúnnen medıtsına qyzmetkerlerine qoldaý kórsetip keledi. Rasynda indetpen kúrestiń alǵy shebinde júrgen dárigerlerge qosymsha aqy tólenýi adamdyq edi. Dárigerlerdiń erligi jyrǵa arqaý, ánge áýen bolyp shyrqalyp jatqany da halyqtyń olarǵa degen zor yqylasy men qurmeti degen oryndy. Sonymen birge, shaǵyn jáne orta bızneske de qoldaý jaqsy ekendigin Prezıdentimizdiń osy málimdemesinde anyq aıtyldy. Mysaly 1,6 mıllıonnan astam, 11,5 myń bıznes ókilderine jalpy somasy 360 mıllıardtan astam teńgeni qurap otyrǵan óz nesıelerin keıin tóleý múmkindiginiń jasalýy da ekonomıkanyń negizgi bir býynynyń álsiremeı, nyǵaıa túsýine oń áser eteri de anyq.
Kóktemgi dala jumystaryn oıdaǵydaı ótkizý úshin jasalyp jatqan sharýa úshin shyn qýanamyn. Óıtkeni «kóktemniń bir kúni jylǵa azyq» degen sóz bar. Azyq túlik qaýipsizdigin qamtamasyz etýge jasalyp jatqan osy qadam bizdiń elimizdiń aldaǵy ýaqytta «nansyz» qalmaýyna áser eteri de anyq!»,- dep qorytyndylady Jabal Erǵalıev.
