Karantın: Saıramda kelin túsirip, qyz uzatqandar anyqtaldy
TÚRKІSTAN OBLYSY. QazAqparat - Saıramdyq polıtseıler karantın kezinde qonaqtar shaqyryp, toı ótkizip jatqan turǵyndardy anyqtady, dep habarlaıdy Polisia.kz.
Túrkistan oblysynyń polıtseıleri karantın talaptarynyń saqtalyp, onyń oryndalýy barysynda qarqyndy jumys júrgizýde.
Osyndaı kezekti jumys kúninde Saıram APB-ne Mankent aýylyndaǵy turǵynnyń biri óz úıinde 50-den astam azamattardy jınap, kelin túsirý toıyn ótkizip jatqandyǵy týraly habarlama kelip tústi.
Aqparat alysymen atalmysh meken-jaıǵa aýdandyq polıtseıler men ákimdik qyzmetkerlerinen qurylǵan mobıldik top tez arada jetip, tekserý jumystaryn júrgizdi.
Nátıjesinde polıtseıler yǵy-jyǵy adam jınalǵan toıdy toqtatty. Karantın talaptaryn saqtamaı, óreskel quqyq buzǵany úshin toı ıesine QR ÁQBtK-niń 425-babyna sáıkes «Halyqtyń sanıtarlyq-epıdemıologııalyq salaýattylyǵy salasyndaǵy zańnama talaptarynyń, sondaı-aq gıgıenalyq normatıvterdiń buzylýy» hattama toltyryldy.
Jınaqtalǵan aqparattar sheshim qabyldaý úshin tıisti organǵa jiberildi. Aýdanda osyǵan uqsas taǵy eki jaıt tirkeldi. Onyń birinde jergilikti turǵyn óz úıine 20-dan astam adam jınap, kelin túsirgen. Al kelesi turǵyn 15-ten astam adam jınap, qyz uzatý toıyn ótkizgen. Bul eki jaıtta da mobıldik top shuǵyl jetip, adamdardyń kóptep shoǵyrlanýyna jol bermeı, toı-jıyndardy toqtatqan.