Karantın saldarynan eń kóp qaı sala zardap shekti: Myrzahmetovtiń jaýaby
NUR-SULTAN. QazAqparat – «Atameken» UKP basqarma tóraǵasy Abylaı Myrzahmetov koronavırýs saldarynan jumysy qıyndaǵan kásipkerler týraly aıtty, dep habarlaıdy QazAqparat tilshisi.
Búgin Ortalyq kommýnıkatsııalar qyzmetinde ótken baspasóz máslıhatynda koronavırýs indetiniń saldarynan qansha kásipker jumysyn jandandyra almaı otyrǵany suraldy.
«Іndet kásipkerler jumysyna eleýli qıyndyqtar alyp keldi. Bizdiń orta esep boıynsha karantınde qyzmet kórsetý salasyndaǵy 800 myńnan astam kásipker qıyndyqqa tap boldy. Sanıtarlyq dárigerlerdiń buıryǵyna sáıkes, olardyń 500 myńnan astamynyń jumysy toqtap turdy. 17 tamyzdan bastap jumystaryna kiristi», - dedi A. Myrzahmetov.
Onyń sózine qaraǵanda, áli de jumysyn bastaı almaı otyrǵan kásipkerler bar. Osy oraıda qoǵamdyq tamaqtaný salasyndaǵy ashanalar, meıramhanalar men dámhanalar tolyq kúshinde jumysqa kirispedi. Ashanalar óziniń shyǵynyn óteı almaǵannan keıin, jumysyn tıisti deńgeıde bastaı almaı tur.
Budan buryn habarlanǵandaı, A. Myrzahmetov kóleńkeli ekonomıka negizinen saýda salasynda bolyp otyrǵanyn aıtty.
