Karantın saldarynan 11 myń salyq tóleýshiniń iskerlik belsendiligi quldyrady - Qarjy mınıstri
«Aldyn ala derekterge sáıkes, osy jylǵy 9 aıdyń qorytyndysy boıynsha memlekettik bıýdjettiń atqarylý kórsetkishteri kelesideı qalyptasty. Memlekettik bıýdjetke 6,1 trln teńge somasynda kirister tústi nemese jospar 95,5 paıyzǵa atqaryldy. Respýblıkalyq bıýdjetke kirister 3 trln 853 mlrd teńge somasynda tústi nemese jospar 85,8 paıyzǵa atqaryldy. Kirister boıynsha jospardyń atqarylmaýy 638 mlrd teńgeni qurady. Onyń ishinde salyqtar – 791 mlrd teńge», - dedi mınıstr.
Onyń atap ótýinshe, negizgi atqarylmaý somalary qosylǵan qun men korporatıvtik tabys salyqtaryna tıesili boldy.
«Korporatıvtik tabys salyǵynyń atqarylmaýyna mynadaı faktorlar áser etti. Birinshiden - negizgi eksporttyq pozıtsııalar boıynsha baǵanyń orta eseppen 13,3 paıyzǵa quldyraýy; áreketsiz salyq tóleýshiler sanynyń artýy, 850 iri salyq tóleýshi boıynsha málimdelgen avanstyq tólemder somasynyń ótken jyldyń 9 aıymen salystyrǵanda 243,5 mlrd teńgege tómendeýi jáne ekinshi deńgeıdegi bankterden túsetin túsimderdiń 10,2 mlrd teńgege azaıýy. Qosylǵan qun salyǵy boıynsha jospardyń negizgi atqarylmaý sebepteri kelesideı. Birinshiden - ótken jyldyń uqsas kezeńimen salystyrǵanda qosylǵan qun salyǵyn qaıtarýdyń 60 paıyzǵa nemese 200 mlrd teńgege ósýi. Ekinshiden - «Elektrondyq shot-faktýralar» aqparattyq júıe derekterine sáıkes satý boıynsha aınalymdardyń 11 paıyzǵa azaıýy. Negizgi tómendeý taý-ken ónerkásibi salasyna tıesili bolyp otyr. Onda aınalymdar 2019 jyldyń uqsas kezeńimen salystyrǵanda 33 paıyzǵa nemese 4,3 trln teńgege azaıǵan. Úshinshi - karantın rejıminiń engizilýine baılanysty shamamen 11 myń salyq tóleýshiniń iskerlik belsendiligi quldyrady. Olardan túsimder edáýir azaıdy», - dedi Erulan Jamaýbaev.
Degenmen, mınıstr jospar paıdaly qazbalar óndirýge salynatyn salyq pen shıki munaıǵa eksporttyq keden bajy boıynsha asyra oryndalǵanyn aıtty. Sonymen qatar salyqtyq emes túsimder de 154 mlrd teńgege artyǵymen oryndalǵan.
«Jergilikti bıýdjetterdiń kiristeri 118 paıyzǵa atqaryldy jáne 2 trln 274 mlrd teńgeni qurady. Jalpy jospar 348 mlrd teńgege asyra oryndaldy. Onyń ishinde salyqtar boıynsha - 319 mlrd teńgege. Barlyq óńirlerde kirister boıynsha josparlar asyra oryndalýda. Nátıjesinde jergilikti bıýdjetterdiń shottarynda bıýdjet qarajatynyń kassalyq qaldyqtarynyń edáýir somasy qalyptasty. Biz bul jaǵdaıda respýblıkalyq bıýdjetti qalyptastyrý kezinde eskeremiz», - dedi ol.
