Karantın rejımin saqtamaı otyrǵandardyń qatary artýda -Arhımed Muhambetov
QOSTANAI.QazAqparat – Óńirlik kommýnıkatsııalar alańynda ótken brıfıngte Qostanaı oblysynyń ákimi Arhımed Muhambetov karantın rejıminiń saqtalýy týraly aqparat berdi, dep habarlaıdy QazAqparat.
Oblys ákimi Memleket basshysy Qasym-Jomart Toqaevtyń qazaqstandyqtardyń densaýlyǵyn saqtaý úshin ýaqtyly qabyldaǵan sharalarynyń arqasynda elimizde ınfektsııanyń jappaı taralýyna jol berilmegenin atap ótti.
«Búginde óńirde COVID-19 indetiniń 131 jaǵdaıy tirkelgen. Onyń ishinde Jitiqara qalasynda – 87 jaǵdaı, Qostanaıda – 18, Arqalyq qalasynda – 2,Lısakov qalasynda – 2, Rýdnyı qalasynda – 8, Denısov aýdanynda – 5, Qarabalyq aýdanynda – 3, Qostanaı aýdanynda – 5, Fedorov aýdanynda – 1. 27. Mamyrdaǵy jaǵdaı boıynsha 60 adam saýyǵyp ketti. Biz koronavırýstyq ınfektsııanyń taralýyna jol bermeý boıynsha barlyq qajetti sharalardy qabyldap jatyrmyz. Atap aıtqanda, medıtsınalyq jáne epıdemııaǵa qarsy is-sharalardy júrgizý úshin 40 IVL apparatyn, tósek-oryn janyndaǵy 60 monıtor, 11 myń qorǵanysh kombınezondary men basqa da medıtsınalyq jabdyqtardy, medıtsınalyq maqsattaǵy buıymdardy satyp alýǵa jergilikti bıýdjetten 2,1 mlrd teńge bólindi», - dedi aımaq basshysy.
Qostanaı oblysynda Prezıdenttiń qoldaý sharalary sheńberinde epıdemııaǵa qarsy is-sharalardyń basy-qasynda júrgen medıtsına qyzmetkerlerin materıaldyq yntalandyrý jumystary júrgizildi. Naýryz aıynda 365 medıtsınalyq qyzmetkerge 51,6 mln teńge somasynda ústemaqy tólense, sáýirde 1518 dáriger 242,5 mln teńge kómek aldy. Qazir bekitilgen kestege sáıkes PTR ádisimen halyqtyń osal toptaryn ınfektsııaǵa testileý júrgizilip jatyr. Óńirde 7 zerthanada KVI-ǵa saraptama júrgiziledi. Maýsym aıynyń ortasyna deıin Ulttyq saraptama ortalyǵynyń bazasynda táýligine 400 zertteýge deıin qosymsha zerthana ashý josparlanýda. Jalpy, algorıtmge sáıkes koronavırýstyq ınfektsııanyń bar-joǵyna 29217 zertteý júrgizildi.
«Pandemııamen kúrestiń eń tıimdi joly – jeke gıgıenany saqtaý. Muny dárigerler rastap otyr. Alaıda, karantın rejımin saqtamaı otyrǵandardyń qatary kún saıyn artýda. Arnaıy monıtorıngtik top 14 myńnan astam tekserý júrgizdi. Karantın rejımin buzýdyń 267 jaǵdaıy tirkelip, 274 aıyppul salyndy. Bulaı jalǵasa bermeıdi. Eger turǵyndar saqtyq sharalaryna salǵyrt qarasa, qatań karantın rejımine qaıta oralamyz. Sondyqtan turǵyndardy shekteý sharalaryna barynsha saq qaraýdy shaqyramyn. Jaqyndaryńyzdyń densaýlyǵyna jaýaptysyzdar. Toı-dýmandy shekteı turaıyq, munyń bári sizder úshin jasalyp jatyr», - dedi Arhımed Muhambetov turǵyndardy karantın rejımin buzbaýǵa shaqyryp.
Oblys ákimi atap ótkendeı, 1 maýsymda óńirlik shtab keńes ótkizedi. Onda óńirde qatań karantın rejımin engizý-engizbeý máselesi qaralady.
