Karantın rejımin buzýshylar jazasyn qalaı ótep jatyr
ALMATY. QazAqparat – Karantın bastalǵan ýaqyttan beri Almatyda arnaıy oqshaýlaý ornyna 172 adam qamalyp, keıin bostandyqqa shyqqan, dep habarlaıdy QazAqparat tilshisi.
Bul Іshki ister organdarynyń ákimshilik jazaǵa tartylǵandardy arnaıy oqshaýlaýǵa alatyn orny. Munda sot sheshimimen ákimshilik qamaýǵa alynǵan tulǵalar, qoǵamdyq tártipti buzshylar otyrady.
«Bul bylaısha aıtqanda, shaǵyn túrme. Munda adam qatań belgilengen tártippen júrip-turady. Serýendeý, tamaq ishý, uıyqtaý merzimi qatań tártippen baqylanady. Qamaýdaǵy azamattardyń barlyǵy, áıelderi de, erleri de, osy tártipke baǵynady», - dedi qalalyq Polıtsııa departamentiniń Ákimshilik polıtsııa basqarmasynyń basshysy Jandos Muratalıev.
Bul mekemeniń ishi birneshe beınekameralarmen jabdyqtalǵan.
Kezekshi polıtsııa qyzmetkeri qamaýdaǵy tulǵalardyń júris-turysyn baqylap turady.
Kameralarda eń kóp degende 10 adam otyrady.
Taza aýaǵa serýendeýge shyqqanda da arnaıy jasalǵan tordyń ishinde júredi.
«Birinshi túsken adam bul jerge bastapqyda úırene almaıdy. Adamdardy qoǵamdyq tártipti saqtaýǵa shaqyramyn. Túrli nashaqor, maskúnem, buzaqylarmen birneshe kún birge ótkizgenshe, úıde karantın tártibin buzbaı otyrý anaǵurlym durys», - dedi Muratalıev.
Aıta ketý kerek, Almatyda 19 naýryzdan bastap Tótenshe jaǵdaı týraly zańnamany buzǵany úshin 346 adam ákimshilik jaýapkershilikke tartylǵan.
Sot sheshimimen 172 adam ákimshilik qamaýǵa alynsa, qalǵanyna aıyppul salynǵan.
