Karantın rejımin buzǵandar qalaı jazalandy - Bas sanıtar
«Qazirgi ýaqytta elimizdiń barlyq óńirinde karantındik sharalardyń saqtalýyn tekseretin 644 monıtorıngtik top bar. Olar ákimdik janynan qurylǵan jáne quramynda jergilikti atqarý organdarynyń, polıtsııa qyzmetiniń jáne sanıtarlyq qyzmettiń ókilderi bar. 5 shildeden búgingi kúnge deıin monıtorıngtik toptar karatın jaǵdaıynda jumys istep jatqan 25 438 nysandy tekserdi. Onyń 12 protsentinde nemese 3 myń nysanda karantın talaptarynyń buzylǵany anyqtaldy», - dedi spıker Ortalyq kommýnıkatsııalar qyzmetinde ótken onlaın brıfıngte.
Onyń aıtýynsha, karantınniń alǵashqy aptasynda monıtorıng toptary karantın rejımin buzǵandardy jaýapqa tartpaı, túsindirý jumystaryn ǵana júrgizgen. Osylaısha, monıtorıng toptary kásipkerlerge 16 myń usynym bergen. 742 nysan ózdiginen karatındegi jumysyn toqtatqan.
«Tekserýde anyqtalatyn negizgi buzýshylyqtar – maska taqpaý, ara qashyqtyq saqtamaý, qyzmetkerlerdi maskamen jáne antıseptıkpen qamtamasyz etpeý jáne naýryz aıynan beri tyıym salynǵan jappaı buqaralyq sharalar ótkizý faktileri de tirkeldi. Odan bólek, sanıtarlyq-epıdemıologııalyq baqylaý organdary jospardan tys 270 tekserý júrgizip, barlyǵynan derlik quqyqbuzýshylyq tapqan. Tekserý qorytyndysy boıynsha ákimshilik quqyqbuzýshylyq týraly 1036 hattama toltyrylyp, 202 uıǵarym berilgen. 23 kásipkerlik nysannyń jumysy toqtatyldy. Tekserý aıasynda anyqtalǵan quqyqbuzýshylyqtar úshin 457 laýazymdy tulǵa 65 mln teńgege jaýapqa tartyldy», - dedi A. Esmaǵambetova.
Jeke tulǵalar arasynda 5 shildeden bastap, 495 adamǵa 20 mln astam teńge aıyppul salyndy. Ásirese, Almaty qalasy men Túrkistan oblysynyń turǵyndary kóp ereje buzǵan. Qalǵan óńirlerdiń barlyǵynda birli-jarym quqyqbuzýshylyqtar tirkelgen.
Buǵan deıin spıker eki aptalyq karantınde syrqattar ósiminiń bolmaǵanyn málimdedi jáne toı jasaýdy toqtatpaǵan óńirlerdi atady.