Karantın rejimi: Elordada 30 avtokólik arnaıy aıyppul turaǵyna qoıyldy
NUR-SULTAN. QazAqparat – Elordada karantın rejimin buzǵany úshin 30 avtokólik arnaıy aıyppul turaǵyna qoıyldy. Bul týraly Nur-Sultan qalasy Polıtsııa departamentiniń basshysy Erjan Sádenov málim etti, dep habarlaıdy QazAqparat tilshisi.
«30 naýryzdan bastap tótenshe jaǵdaı rejimi kúsheıtildi. Nur-Sultan qalasy Polıtsııa departamenti ınfektsııa taralýynyń aldyn alý úshin barlyq qajetti sharalardy qabyldady. Patrýldik polıtsııa jasaqtary kóbeıtildi. Azamattardyń jáne avtokólikterdiń qozǵalysy qalanyń barlyq aýdanynda qatań baqylaýǵa alyndy. Polıtsııa qyzmetkerleri qalada táýlik boıy qyzmet atqarýda», - dedi E. Sádenov «Habar 24» telearnasynda ótken onlaın brıfıngide.
Onyń sózine qaraǵanda, qalada 26 mobıldik beket qoıylyp, olar avtokólik qozǵalysy boıynsha jumys isteýde.
«Tek keshegi kúni 1 500-ge jýyq júrgizýshi jáne 200-den astam jaıaý júrginshimen profılaktıkalyq túsindirý jumystary júrgizildi. 30 avtokólik arnaıy aıyppul turaǵyna qoıyldy», - dedi departament basshysy.
Aıta keteıik, 28 naýryzdan bastap elordada azyq-túlik alýǵa, medıtsınalyq qyzmettiń kómegine júginýge nemese dári-dármek satyp alýǵa, sondaı-aq jumysqa barýǵa shyqqan adamdarǵa kóshege shyǵýǵa ruqsat etilgen. Kámelet jasyna tolmaǵandarǵa eresekterdiń qaraýynsyz qala ishinde júrýge bolmaıdy.
