Karantın: Nur-Sultanda jumysyn toqtatpaǵan meıramhanalar jaýapqa tartyldy

NUR-SULTAN. QazAqparat – Nur-Sultan qalasy Investıstıtsııalar jáne kásipkerlikti damytý basqarmasynyń basshysy Erlan Bekmyrzaev karantın rejımin buzǵan kásipkerler týraly aıtyp berdi, dep habarlaıdy QazAqparat.

«19 naýryzdan bastap qalamyzda karantın engizildi jáne qalada jedel shtab óz jumysyn jalǵastyrady. Shtab boıynsha negizgi qujat qabyldandy. Bul sheshimmen azyq-túlik pen qajetti taýarlardy satatyn nysandardan basqa bıznes sýbektileriniń jumysy toqtatyldy. Bıznes-ortalyqtar men tehnıkalyq qyzmet kórsetý stantsııalary úshin tańǵy saǵat 10.00-den 17.00-ge deıingi jumys kestesi bekitildi», - dedi spıker qala ákimdiginde ótken onlaın-brıfıngte.

Sonymen birge, basqarma basshysy jumysy toqtatylmaǵan shaǵyn jáne orta bıznestiń sanıtarlyq sharalardy kúsheıtýi qajettigin eske saldy.

Qoǵamdyq tamaqtaný nysandary jabyldy. Biraq, olar onlaın tapsyrys pen jetkizý qyzmeti arqyly jumys isteı alady. Elordada 344 meıramhana bar. Almaty aýdanynda – 52, Esil aýdanynda – 192, Baıqońyrda – 40 jáne Saryarqa aýdanynda – 60.

«Karantın rejımin buzý faktileriniń aldyn alý úshin polıtseıler, ákimdik jáne eriktiler kúndelikti reıd júrgizedi. Jumysyn toqtatpaı, kelýshilerdi qabyldaǵan meıramhanalar anyqtaldy. Olarǵa qatysty quziretti organdar qajetti shara qabyldaýda. Biz úshin azamattardyń densaýlyǵy men qaýipsizdigi mańyzdy. Eger osyndaı quqyqbuzýshylyqqa kýá bolsańyz, habarlasýyńyzdy suraımyz. Ákimdikte táýlik boıy jedel shtab jumys isteıdi. 109 nemese 1432 nómirine habarlasa alasyzdar», - dedi Erlan Bekmyrzaev.