Karantın: Nur-Sultanda mereke kúnderi reıdter kúsheıtiledi
NUR-SULTAN. QazAqparat – Nur-Sultan qalasynda mereke kúnderi karantın rejıminiń buzylýyn anyqtaý boıynsha mobıldi toptar jumysy kúsheıtiledi, dep habarlaıdy QazAqparat.
Elorda ákimdiginen málim etkendeı, 14 jeltoqsandaǵy jaǵdaı boıynsha Nur-Sultan qalasynyń sanıtarlyq-epıdemıologııalyq baqylaý basqarmalaryna polıtsııadan karantındi buzǵan adamdarǵa qatysty 2271 materıal kelip túsken. Jalpy somasy 229 377 234 teńgeni quraıtyn 1167 jeke jáne zańdy tulǵa ákimshilik jaýapkershilikke tartyldy.
«Buǵan deıin birqatar túngi klýb pen meıramhanaǵa qatysty buıryqty oryndamaǵany úshin Nur-Sultan qalasynyń mamandandyrylǵan aýdanaralyq ákimshilik sotyna 7 ákimshilik hattama jiberilgeni habarlanǵan bolatyn.
Olar «SOVA» karaoke-bary, «Janym Sol» karaoke-bary, «Alanya» túngi klýby, «Teqila» laýndj-bary, «Echo» bary, «Zoloto» meıramhanasy. Sanıtarlyq-epıdemıologııalyq baqylaý basqarmasy ókilderi sottan olardyń qyzmetin 3 aıǵa deıin toqtata turýǵa ótinim jiberetin bolady», - dedi ákimdikten.
Qaýipsizdikti qamtamasyz etý úshin kóshede jáne kópqabatty úılerdiń aýlalarynda, ásirese oıyn-saýyq mekemeleriniń alańdarynda jáne basqa da azamattardyń jappaı demalatyn oryndarynda patrýlder uıymdastyrylady. Kóshedegi patrýldik bólimshelerdiń tyǵyzdyǵy arttyryldy.
Jalpy, búginge deıin elordada jalpy somasy 184 053 445 teńgege 932 ákimshilik aıyppul tólengen.
